Монголын сагсан бөмбөгийн үндэсний супер лигт тоглож байсан шилдэг легионеруудын нэг болох Крис Жонес өдгөө Евролигийн Валенсиа Баскет багт хүчин зүтгэж буй. Сагсан бөмбөг сонирхогчид түүнийг Төв Ургац багийн бүрэлдэхүүнд гайхалтай тоглолтыг үзүүлж, уулга алдуулам үзүүлэлтийг толилуулж байснаар нь санаж байгаа биз. Тэгвэл өдгөө 29 настай тэрбээр Испанийн Валенсиа Баскет багтай гурван жилийн гэрээ байгуулж, NBA-ийн дараа орох томоохон лиг болох Евролигт тоглож байна. Шинэ багтайгаа нэгдсэнийхээ дараа Крис Жонес Монголд тоглож байсан үеэ эргэн дурсчээ.

Крис Жонес 2015-2016 оны улирал Монголд тоглож байсан талаараа "Гайхалтай байсан. Үнэхээр өөр. Байгаа зүйлсээ улам нандигнан хайрладаг болсон. Монголд бол заалныхаа шалыг ч арчаагүй байхад дарааллаад тоглолтууд болдог байлаа. Тийм учраас байгаа зүйлсээ санагалздаг юм байна лээ" гэв.

Түүнээс сэтгүүлч Монголд хэрхэн амьдардаг байсан талаар нь асуухад "Байр бол том байгаагүй ээ. Бид гурвуулаа хамтдаа нэг орон сууцанд амьдардаг байсан. Нэг угаалгын өрөө дундаа хэрэглэдэг. Хувцсаа гараараа угааж, хатаах гэж өлгөдөг байлаа. Хэцүү байсан шүү" гэж инээн ярьжээ.

Харин Испанийн Валенсиа Баскеттай нэгдсэн талаараа "Одоо энд, ялангуяа Валенсиа бол надад NBA шиг санагдаж байна. Энэ бол миний NBA. Баг маань Евролигт үлдэхийг хүсч байгаа. Энэ бол бидний зорилго. Бид Евролигт үлдэхийн төлөө бүтэн улирал хичээлээ. Зарим тоглолт санаснаар болсонгүй. Хэн ч бидэнд итгээгүй гэж хэлж болно. Харин нэг, хоёрдугаар сард манай багийг плей-оффын төлөө дайралт хийж байгааг сонссон биз" гэсэн юм.

Крис Жонес Евролигийн эхний улиралдаа 23 минутыг талбайд өнгөрүүлэхдээ 13.7 оноо, 2.2 самбараас бөмбөг авалт, 4.4 ашигтай дамжуулалт дунджилжээ.

Гэхдээ тэрбээр Монголд байсан цаг үедээ талархаж, их зүйл ухааруулсан гэдгийг тодотгож байлаа. Жонес "Туулсан замаа өөрчлөхгүй ээ. Туулсан бүхэн маань л өнөөдрийн намайг бүтээсэн. Надад олдох бүх боломжуудын давуу талыг нь эрэлхийлнэ" гэв.

Түүнээс Монголд тоглох гэж буй америк тамирчдад ямар зөвлөгөө өгөх вэ гэж асуухад "Өөртөө итгэ. Хөдөлмөрлө. Чиний цаг гарцаагүй ирнэ. Магадгүй хүссэнээс чинь хожим ирж магадгүй. Чамд боломж олдвол зүгээр л ашиглаарай" гэж захижээ.

Крис Жонес үндэсний супер лигийн 2015-2016 оны улирлын "MVP"-ээр тодрохдоо 30.4 оноо, 8.8 самбар, 8.1 дамжуулалт, 4.4 бөмбөг таслалтыг дунджилж байлаа.

Валенсиа Баскет баг энэ улирал Испанийн лигтээ 13-9 гэсэн амжилттай долдугаар байрт яваа бол Евролигт 13-13 гэсэн амжилттай есдүгээр байрт явна. Крис Жонес өдгөө Жастин Андерсон, Семи Ожелей, Жаред Харпер зэрэг NBA-д данстай явсан залуустай хамт тоглоод зогсохгүй багийн лидерийн үүргийг гүйцэтгэж байна.

Ингээд харахаар Крис Жонес Монголын лигээс Евролигт хүрсэн гэхээр үнэхээр өндөр түвшний сагсан бөмбөгийн тамирчин байсан гэдэг нь харагдаж байгаа биз.