Ц.Элбэгдоржийн жиргээ дэлхийг шуугиулав

Монгол Улсын дөрөв дэх Ерөнхийлөгч Ц.Элбэгдоржийн жиргээ дэлхий нийтийг шуугиулж байна. Тэрбээр ОХУ-ын ерөнхийлөгч В.Путины дайнаас хойш анх удаа барууны хэвлэлд ярилцлага өгсөнтэй холбогдуулж "Путиний ярилцлагын дараа би Монголын түүхэн газрын зургийг олж үзлээ. Бүү санаа зов. Манайх бол энхийг эрхэмлэгч, эрх чөлөөт улс” гэсэн нь "Х" ертөнцийг шуугиулж байна.

Тодруулбал, сар шинийн үеэр "Fox News" сувгийн хөтлөгч асан Такер Карлсоны ОХУ-ын ерөнхийлөгч Владимир Путинтэй ярилцлага хийсэн юм. Энэхүү ярилцлага "Х" платформд нийтлэгдсэн агаад В.Путин уг ярилцлагынхаа турш Украинд хийсэн цэргийн түрэмгийллээ зөвтгөх гэж түүхийн баримтуудыг дурджээ. Ярилцлагад В.Путин "Оросын үе үеийн эзэнт гүрнүүд Польш, Унгар, Румын, Крымээс газар нутгаа шилжүүлэн Украины орчин үеийн хил хязгаарыг хэрхэн бүрдүүлж байсныг мөн Украин бол Сталины хүслээр бий болсон хиймэл улс гэдгийг батлах бүрэн үндэслэл бидэнд бий" гэсэн нь дэлхийн хэвлэлүүдээр цацагдсан.

В.Путины дэлгэсэн түүхийн баримтуудыг няцаасан Монгол Улсын Ерөнхийлөгч асан Ц.Элбэгдоржийн жиргээ өнөөдрийн байдлаар найман сая гаруй хүнд хүрч, 2.5 мянган сэтгэгдэлтэй, 100 гаруй мянга хүн хариу реакшн үзүүлжээ. Дэлхийн "Х" талбарт монгол хүний жиргээ анх удаа олон сая хүнд хүрч, олон мянган хүнээс хариу үйлдэл авч байгаа нь энэ юм.

Тэрчлэн монголчууд төдийгүй дэлхийн зарим улстөрч, хэвлэл мэдээлэл түүний жиргээг "оны онцлох пост боллоо" гэж байр сууриа хуваалцжээ.

Энэ талаар Ерөнхийлөгч асан Ц.Элбэгдорж жиргэхдээ "Монголын нийт хүн амыг хоёр дахин нэмсэнээс илүү хүн одоогоор үзэж. Ерөөлөөр дэлхийн Монгол хүн бүрийн тоогоор үзэх болтугай. Зүгээр л "Путины ярьсаны дараа. Монголын түүхэн газрын зураг. Санаагаа бүү чилээ. Бид эрх чөлөөтэй, энх тайванч улс" гэсэн утгатай жиргээг "Х"-т бичсэн юм. Гэтэл "Оны пост тодорхой боллоо. Дөнгөж хоёр сар гарч байхад" гээд л шуугих.

Ази Европын дээд хэмжээний уулзалт "АСЕМ"-ыг 2016 онд хийхэд ингэж нэг шуугисан. Монголын том нэр гарч шуугих тусам сайн. Бид чинь эрдэмт Монгол хүн, их түүх, эрх чөлөө, Эх орноороо бахархдаг улс шүү. Зарим хэвлэл, хүний бичсэнийг хавсаргав. Өөрсдөө олж үзээрэй" гэжээ.

Монгол Улсын Ерөнхийлөгч асан Ц.Элбэгдоржийн жиргээ болон байр суурь дэлхийн хэвлэлүүдээр үе, үе цацагддаг. Тэрбээр Оросын Украинд хийсэн түрэмгийллийн эсрэг "Зөвлөлтүүд 1941 оны хахир өвлийн улиралд Москва хотын захад Германы цэргийн эсрэг сөрөг довтолгоонд өртөхөд улаан армийн ихэнх хэсэг нь Монголд малын малаар үс, ноосоор хийсэн дулаан хувцас өмссөн байв. Яг ийм сэтгэлээр өнөөдөр Монголын ард түмэн Украины эсрэг Кремлийн дайны эсрэг зогсож байна. …Энх тайванд хүрэх цорын ганц зам бол Украины ялалт юм" гэсэн нийтлэл бичсэн нь euobserver.com сайтад тавигдсан байдаг. Тэгвэл тэрбээр Өвөрмонголчуудын монгол хэл, үндэсний бичгээ хамгаалах гэсэн тэмцлийг дэмжиж, "Монгол хэл соёл, удам угсааг хадгалж үлдэхийн төлөө Монгол хүн бүр дуугарах ёстой. Мөн хүүхдүүдээ багаас нь монгол хэлээр бичих, унших чадварт сургах хэрэгтэй. Түүний дараа гадны олон хэлээр сургаж болно. Энэ бодлого уламжлал хаана ч үргэлжлэх ёстой юм. Энэ байр сууринд ямар ч монгол хүн баттай зогсох ёстой" гэж байр сууриа илэрхийлсэн нь олон улсын хэвлэлүүдээр цацагдаж байсан билээ.