Сагсан бөмбөгийн домогт тамирчин Коби Брайантын гэгээн дурсгалыг хүндэтгэсэн хөшөөний нээлт орон нутгийн цагаар 2024 оны хоёрдугаар сарын 8-ны өдөр боллоо. Энэхүү өдөр нь Коби Брайантын өмсгөлийн дугаар болон түүний охин Жижи Брайантын өмсгөлийн дугаарыг илэрхийлж байгаагаараа онцлог байв. Түүний хөшөө Лос Анжелес хотын "Crypto.com" аренагийн гадна Стар Плазад сүндэрлэжээ.

Коби Брайант болон түүний охин Жижи тэргүүтэй есөн хүн 2020 оны нэгдүгээр сард Калифорни мужийн Калабазасын орчимд нисдэг тэргэнд зорчиж яваад харамсалтайгаар амиа алдсан билээ.

Хөшөөний нээлтэд Элжин Бэйлор, Шакил О’Нил, Карим Абдул-Жаббар, Мэжик Жонсон, Жерри Уэст, Чик Хөрн тэргүүтэй Лэйкерсийн домгууд бусад хүмүүс оролцжээ. Нөхрийнхөө хөшөөний нээлтэд зориулан Ванесса Брайант хэлсэн үгэндээ"Өнөөдөр бидний хувьд маш гунигтай өдөр гэдгийг хэлэх нь илүүц биз ээ. Коби, Жижи хоёр энэ гайхалтай баярын мөч болон Кобигийн өвийг үлдээхээр энд алга. Кобиг дэлхий даяар анхнаас нь дэмжиж байсан маш олон хүмүүс бий. Энэ мөч нь зөвхөн Кобигийн хувьд биш, харин энэ бүх жилүүдийн турш түүний төлөө байсан та бүгдийнх. Лос Анжелес дахь фэнүүдэд хандаж хэлэхэд, энэ хот бол Кобигийн төлөөлж байгаадаа баярладаг байсан онцгой хот. Та бүхэн түүнийг хоёр гараа дэлгэн угтаж, түүнд, түүний өв болон бидний гэр бүлд онцгой байр суурийг эзэлсээр ирсэн. Та бүхний харж байгаа зогсолтыг Коби өөрөө сонгосон. Тиймээс хэн нэгэнд ямар нэгэн асуудал байвал хамаагүй ээ. Энэ ийм л байх ёстой. Өнөөдөр та бүхэн Кобигоос үлгэр дуурайлал авсан одод өндөр оноо авч байгааг харж байгаа байх. Тэр үүнийг мэдсэн бол өөрөөрөө улам бахархаж, энэ спортод улам урам зориг, сэдлийг өгөх байсан гэдгийг би мэдэж байна. Цаг нь ирэхээр энэ спортоос олсноосоо илүүг үлдээгээрэй. Тэр үүнийг хийсэн" гэжээ.

Коби Брайантын шинэхэн хөшөөний санааг түүний алдарт 81 оноо авсан тоглолтоос сэдэвлэж, Омри Амрани, Жули Роблатт-Амрани гэх Лэйкерсийн домгуудын хөшөөг бүтээдэг уран бүтээлчид гүйцэтгэжээ. Кобид зориулж нийт гурван хөшөөг нээх бөгөөд дараагийн хөшөөний нээлт 2024 оны наймдугаар сарын 8-ны өдөр болно гэж эх сурвалжууд байна.