Баяр, наадам дөхсөн өдрүүдэд нийслэлийн авто замууд тэг зогсдог. Өчигдөр тэдгээр өдрийн нэг нь байв. Түгжрэл ихэсч, иргэд нэг байршилдаа 2-3 цаг зогссон төдийгүй халтиргаатай байсан учир автозамын осол олон гарсан байна. Түгжрэлээс шалтгаалж өнөөдрөөс буюу баярын өдрүүдэд Тээврийн цагдаагийн алба хаагчид гэрэл дохиогүй гэрлэн дохиогоор зохицуулах боломжгүй 300 гаруй байршилд ажиллах аж.

Тодруулбал, төв замуудаас гадна хотоос гарах, зуслангийн бүс рүү зорчих иргэдийн урсгал нэмэгддэг учир замын цагдаагийн алба хаагчид болон бусад албан хаагчид зарим шаардлагатай байршилд биет зохицуулалт хийж ажиллах юм байна.

Замын хөдөлгөөний ачаалал үүсч буй шалтгаан нь нэгдүгээрт, томоохон зах, худалдааны төвийг чиглэх хөдөлгөөн эрс нэмэгдсэн. Хоёрдугаарт, нийтийн тээврээр зорчих хүн багасч, хувийн машины тоо өссөн байна. Өдөрт дунджаар нийслэлийн авто замд 140-150 машин нэмэгдэж байгаа аж.

Цаашид ч замын хөдөлгөөний ачаалал эрс нэмэгдэх төлөвтэй байгаа тул зорчих замын ачаалал болон цагийн төлөвлөлтөө зөв зохион байгуулахыг онцолж байна.

Сар шинээр нийслэлд өдөрт дунджаар 300-500 мянган тээврийн хэрэгсэл замын хөдөлгөөнд оролцдог. Мөн судалгаагаар Улаанбаатар хотын нийт хүн амын 45 хувь нь нийтийн тээврээр үйлчлүүлдэг гэсэн мэдээлэл бий. Гэвч цаг агаараас шалтгаалж болон баяраас хамаарч энэ тоон буурдаг байна. Тиймээс хувийн автомашинаас татгалзахыг албаныхан зөвлөж байгаа юм.