Ардчилсан нам Засгийн эрх барьж байхдаа “Буянт-Ухаа-1”, “Буянт-Ухаа-2” орон сууцны хорооллыг барих шийдвэр гаргаж, ашиглалтад оруулж байсан түүхтэй.

Уг орон сууцанд төрийн албан хаагчид болон ахмад настан, хөгжлийн бэрхшээлтэй иргэдийг түрээсээр суулгасан. Түрээсийн төлбөр нь бусад байрныхаас хямд байв. Хоёроос гурван өрөө байр түрээсэлж байгаа тохиолдолд сарын 400 мянгаас 500 мянган төгрөг төлж иржээ. Гэвч Нийслэлийн орон сууцны корпорациас дээрх байрыг түрээсэлж буй 290 иргэнийг зээлд шилж гэдэг шаардлага тавьж эхэлсэн байна. Зээлд шилжсэн тохиолдолд сард 1.2 саяас -1.3 сая төгрөг төлөх шаардлагатай болж буй аж.

Урьдчилгаа төлбөргүйгээс жилийн зургаан хувийн зээлд шилжиж чадахгүй өнөөдрийг хүргэсэн дээрх түрээслэгчдийн хувьд энэхүү шаардлага хүндээр тусах болжээ. Хэрвээ зээлд шилжихгүй бол байраа хураалгах эрсдэлтэй аж. Иймд бодит нөхцөл байдлыг нийслэлийн удирдлагуудад ойлгуулж, шийдвэрээ эргэн харахыг хүсч байгаа юм.

Боломжгүйдээ тэд түрээсийн төлбөр төлж ирсэн. Иймээс нийслэлийн удирдлагуудыг асуудалд уян хатан хандаж, нааштай шийдвэр гаргах болов уу гэж хүлээж байна.

Эл асуудлыг өнөөдөр нийслэлийн Хан-Уул дүүргийн Засаг дарга Ж.Алдаржавхлан Нийслэлийн иргэдийн төлөөлөгчдийн хуралдаанд тавьсан ч хэлэлцэж байгаа асуудалтай холбоогүй гэж үзэн, дараагийн хуралдаанд холбогдох албан тушаалтнуудаар тайлбар өгүүлэхээр болоод байна.

Г.ХОРОЛ