Улсын мөрдөн байцаах газрын зургадугаар хэлтсийн алба хаагчид хууль бусаар мод бэлтгэн, тээвэрлэж явсан иргэдийг илрүүлэн саатуулсан байна. Баянзүрх дүүргийн 19 дүгээр хорооны нутаг “Цайз” захын орчимд наймдугаар сарын 30-31-нд шилжих шөнө 30 настай, эрэгтэй Б гэгч машин жолоодох эрхийн үнэмлэхгүйгээр машин барьж, ямар ч зөвшөөрөлгүйгээр мод ачин явж байжээ. Иргэн Б нь Төв аймгийн Цээл сум Хүүлээ Хан багийн харьяат бөгөөд УНН 61-17 Hyundai Maygthy маркийн машинд хууль бусаар мод тээвэрлэж явсан аж. Мөн энэ шөнө тус дүүргийн 21 хорооны нутаг Тоосгоны үйлдвэрийн орчимд Хөвгөл аймгийн харьяат 26 настай, эрэгтэй Э гэгч УБУ 31-35 дугаартай ЗИЛ130 машинаар хууль бусаар мод тээвэрлэж явсныг илрүүлжээ. Дээр дурдагдсан хэргүүдийг Баянзүрх дүүргийн Цагдаагийн хэлтэст шалгаж байгаа юм.
Г.Дарь