Кыргызстаны нийслэл Бишкек хотын иргэд хоёрдугаар сарын 2-ны өглөөг халуун ус, халаалтгүй угтжээ. Учир нь Киргизийн эрчим хүчний хэрэглээний 15 орчим хувийг хангадаг хамгийн том дулааны цахилгаан станцад өмнөх шөнө нь дэлбэрэлт болсон байна. Дэлбэрэлтийн улмаас станцын таван ажилтан шархаджээ.

Албаны хүмүүс эхэндээ ослын шалтгааныг хорлон сүйтгэх ажиллагаатай холбож сэжиглэж байсан. Харин улсын Ерөнхий прокурорын газраас энэ хувилбарыг үгүйсгэж, техникийн ажилтнууд албан үүргээ зохих ёсоор гүйцэтгээгүй, аюулгүй ажиллагааны дүрмийг дагаж мөрдөөгүй зэрэг илүү магадлалтай шалтгааныг дэвшүүлжээ.

Эсвэл Шабыркул хэмээх шинэ төрлийн нүүрс ашиглаж эхэлснээс болж осол гарсан байж болзошгүй аж. Энэ нь өмнө нь ашигладаг байсан Кара-Кечегийн нүүрснээс илүү хүчтэй шатдаг. Тиймээс техникийн ажилтнууд нь нүүрсний шаталтын хүчийг зөв тооцоолоогүй гэж таамаглаж байна.

Үндэсний аюулгүй байдлын ерөнхий хороо болсон явдалтай холбоотойгоор эрүүгийн хэрэг үүсгэн шалгаж эхэлжээ.

Ослын улмаас хотын өмнөд хэсэг халаалтгүй болж, хот даяараа халуун усгүй болсон. Мөн сургуулийн хүүхдүүдийг гэртээ байхыг тушаажээ.

Ерөнхийлөгч Садыр Жапаров, Үндэсний Аюулгүй байдлын зөвлөлийн дарга Камчыбек Ташиев тэргүүтэй дээд албан тушаалтнууд станцад биечлэн очиж, нөхцөл байдалтай танилцав.

Осол болсон хэсэг нь станцын хуучин хэсгүүдийн нэг аж. Ерөнхийлөгч Жапаров байгууламжийг бүхэлд нь шинэчлэх үүрэг чиглэл өгчээ. Мөн шинэчлэлийг хэрэгжүүлэхэд шаардлагатай санхүүжилтийг хайна гэдгээ мэдэгдсэн байна. Тус үйлдвэрт 2017 онд 400 сая ам.долларын өртөгтэй засвар хийсэн боловч 2018 оны нэгдүгээр сард томоохон гэмтэл гарч, оршин суугчид хэд хоног халаалтгүй болж байсан.

Өмнөх засгийн газрууд 1961 онд баригдсан уг цахилгаан станцын засвар үйлчилгээг хангалттай сайн гүйцэтгээгүй. Энэ хугацаанд зарцуулсан мөнгөөр цоо шинэ станц барих боломжтой байсныг ерөнхийлөгч Жапаров онцолжээ.

Эх сурвалж: EURASIANET