Халаасны хулгайн гэмт хэрэг өсч байгаа учир иргэдийг автобус болон зах худалдааны төвөөр зорчихдоо сэрэмжтэй байхыг Цагдаагийн ерөнхий газраас анхааруулж байна. 2024 оны нэгдүгээр сарын байдлаар Нийслэлийн цагдаагийн удирдах газрын Халаасны хулгайн гэмт хэрэгтэй тэмцэх хэлтэст нийт 121 халаасны хулгайд өртсөн дуудлага бүртгэгдсэн байна.

Эд зүйлээ халаасны хулгайчид алдсан дуудлага мэдээллийн 69,6 хувь нь зах худалдааны төв, автобусны буудал, автобус дотор гарчээ.

Хүмүүс ихэнхдээ гадуур хувцасны кармандаа гар утас, хэтэвч, бэлэн мөнгийг хийснээр эд хөрөнгө, үнэт зүйлсээ алдсан байна. Иймд цагдаагийн байгууллагаас иргэдийг сонор сэрэмжтэй байж хулгайн гэмт хэрэгт өртөхөөс сэрэмжлүүллээ.

Цагдаагийн байгууллагаас энэ төрлийн гэмт хэргээс урьдчилан сэргийлэх зорилгоор зах, худалдаа үйлчилгээний газруудаар нэгдсэн эргүүл, хяналт, шалгалтыг зохион байгуулан ажиллаж байгаа аж. Сар шинийн баяр болох гэж байгаатай холбогдуулан иргэд томоохон зах, худалдааны төв, үзэсгэлэн худалдаагаар үйлчлүүлэхдээ халаасны хулгайн гэмт хэргийн хохирогч болох тохиолдол цөөнгүй байгаа учир олон хүн цугласан газраар зорчихдоо сонор сэрэмжтэй байж, аль болох их хэмжээний бэлэн мөнгө биедээ авч явахгүй байх нь зүйтэй аж.