Тавьсан будаа хөлдөхгүй таван ес дуусах дөхсөн ч идэр хүйтний жавар их хотод тачигнасан хэвээр.  Улсын нийслэл гэгдэх нэрэндээ баймааргүй иргэдийн тэсвэрийг барсан улирал, үзэгдэл Улаанбаатарыг эрхгүй орхигдсон хот мэт санагдуулна.

Гялгар зам талбайг цэвэрлэх тохижилт үйлчилгээний ажилтнууд үүр шөнийн заагтай уралдаж ажиллаж, өдрөөр ээлж сэлгэн замын мөс хүрздэх нь хүртэл тухгүй сонсогдоно. Зуны дэлгэр цагт тоос тортогт дарагддаг хот маань өвлийн эд хүйтэнд ч мөсөөр бүрхүүлж өнгө будаг нь сүлэлдэх шиг.

Хаашаа ч харсан завгүй хүмүүс бээцэгнэн хэрэндээ л хурдан хурдан алхалж, автобусны буудал дээр зүгийн нийтийн тээврээ харуулдан алсыг ширтэх иргэд шивэр авир гэлцэн үглэн зогсоно.

Албан шаардлагаар нийслэлийнхэн их цэвэрлэгээнд дайчлагдсан ч гудамж талбай, замын халтиргаа гулгааг арилгаж эс барах дүр зураг өдөр бүр нэгэн хэвийн үргэлжилнэ. Халтиргаат замуудаар зорчих машин бүү хэл алхах хүн ч олдохгүй, хаа нэг мөс хүрздэх ТҮК-ийнхэн л хань бараагүй ажиллах аж…