Хятадын Батлан хамгаалахын шинэ сайд Дун Жун Лхагва гаригт ОХУ-ын Батлан хамгаалахын сайд Сергей Шойгутай видео дуудлага хийжээ. Тэрбээр өнгөрсөн сард албан тушаалаа хүлээж авснаасаа хойш анх удаа чухал түнштэйгээ яриа хэлэлцээ хийж буй нь энэ юм.

Дун Жун энэ үеэр "Дэлхийн аюулгүй байдал, тогтвортой байдлыг сахин хамгаалахад улам их үүрэг гүйцэтгэхийн тулд хоёр талын цэргийн харилцааг улам өндөр түвшинд хүргэх болно. Орос, Хятадын арми дэлхийн хэмжээнд тулгамдаад буй сорилтод тууштай хариу өгч, харилцан стратегийн итгэлцлээ үргэлжлүүлэн бэхжүүлэх болно" гэж хэлжээ.

Хятадын Батлан хамгаалахын сайдын хувьд Дун Жун Тайвань болон Өмнөд Хятадын тэнгисийн асуудлаарх мөргөлдөөний эрсдлийг бууруулахын тулд АНУ-ын армитай хамтран ажиллах ёстой. Тайванийн асуудлаас болоод тасалдаад байсан Хятад, АНУ-ын цэргийн дээд хэмжээний хэлэлцээ арванхоёрдугаар сард дахин эхэлсэн билээ.