Мета компанийн захирал Марк Зукерберг тэргүүтэй технологийн акулууд хүүхдийн аюулгүй байдлын асуудлаар АНУ-ын Сенатын сонголд асуугдлаа. Олон нийтийн сүлжээнээс болж хүүхэд нь хохирсон гэр бүлийн төлөөллүүд Сенатын сонсголд оролцсон бөгөөд  Зукерберг тэднээс уучлалт гуйжээ.

Зукербергийн мэдэлд инстаграм, фейсбүүк олон нийтийн сүлжээ байдаг. Түүнээс гадна тикток, твиттер /Х/, снапчат, дискорд зэрэг платформуудын боссууд олон нийтийн сүлжээнд хүүхдийн эрх зөрчигдөж, гэмт хэргийн золиос болж буй асуудлаар дөрвөн цагийн турш байцаагджээ. АНУ-ын хууль тогтоогчдын зүгээс технологийн фирмүүд цахим орчинд хүүхдийг хэрхэн хамгаалж байгааг мэдэхийг хүсэв. Мөн энэ нь сенатуудын хувьд технологийн боссуудыг байцаах ховор боломж байлаа.

Зукерберг болон тиктокийн гүйцэтгэх захирал Шоу Зи Чю нар сайн дураараа мэдүүлэг өгөхийг зөвшөөрсөн боловч снап, твиттер болон дискордын удирдлагууд сайн дураараа оролцохоос татгалзсанаар Засгийн газраас зарлан дуудах хуудас илгээсэн байна. Сонсголд хүүхдүүд нь өөрийгөө гэмтээсэн эсвэл амиа хорлосон гэх гэр бүлүүд оролцож, хууль тогтоогчдыг олон нийтийн сүлжээнд хууль эрхзүйн орчныг чангатгахыг шаарджээ.

Сонсголын ихэнх хугацаа хүүхдийг цахим ертөнцөд бэлгийн мөлжлөгт өртөж буй асуудалд төвлөрсөн бол сенатууд боломжийг ашиглан сэдвээс гажсан олон асуудалд тэднээс хариулт авч, бүр тангараг өргүүлсэн байна. Тухайлбал, тиктокийн гүйцэтгэх захирал Шоу Зи Чюгээс голчлон АНУ-ын хэрэглэгчдийн мэдээллийг Хятадын засгийн газарт хуваалцдаг эсэхийг асууж, байцаажээ. Шоу Зи Чю "Гурван хүүхдийн эцэг хүний хувьд өнөөдөр бидний ярилцаж байгаа асуудлууд аймшигтай бөгөөд эцэг эх бүрийн хар дарсан зүүд гэдгийг мэднэ" гэсэн ч хүүхдүүд  нь Сингапурын хууль дүрмийн улмаас тикток ашигладаггүй гэдгийг хүлээн зөвшөөрсөн байна. Харин Зукербергийн тухайд АНУ-ын хууль тогтоогчидтой байнга асуудалд ордог бөгөөд өмнө нь Конгресст найман удаа мэдүүлэг өгсөн.

СЕНАТУУД БУХИМДАВ

Бүгд найрамдах намын сенатор Тед Круз хэлэхдээ, инстаграм хэрэглэгчдэд хүүхдийн бэлгийн хүчирхийллийн зураг, бичлэгийг үзэх боломжтой байгааг анхааруулж байсан ч Зукерберг юу ч хийгээгүй гэж бухимджээ.  Зукерберг биечлэн инстаграмын алгоритм болон бусад зүйлсийн сайжруулалтыг хянахаа амлаж, хүүхэд нь хохирогч болсон гэр бүлүүдээс уучлал гуйсан байна.

Сонсголын гол цөм нь олон нийтийн сүлжээнд байрлуулсан материалд компанийн эздэд хариуцлага хүлээлгэхэд чиглэсэн Конгрессын  хууль тогтоомжид хандаж буй компаниудын хандлага байв. Энэ асуудлаас болж дискордын захирал Жейсон Ситрон болон Бүгд найрамдах намын хууль тогтоогч Линдси Грахам хоёрын хооронд хурц маргаан дэгджээ.  Грахам цахим аюулгүй байдалтай холбоотой Конгрессоор хэлэлцүүлж буй хэд хэдэн хуулийн төслийг жагсааж, Ситроноос дэмжиж байгаа эсэхийг нь асуусан байна. Тэрбээр Ситронд хариулах маш бага боломж өгсөн ч дискордын босс асуултын ихэнхэд нь тайлбар хийжээ.