Украины ерөнхийлөгч Зеленский болон түүний гэр бүлийн орлого 2022 онд гурав дахин буурчээ. Тодруулбал, 2021 онд 285 мянган ам.доллар байсан бол 2022 онд 97700 ам.доллар болсныг Украины ерөнхийлөгчийн албаны цахим хуудаснаас харж болох аж. Зеленский ил тод байдлыг дэмжих, авлигыг устгах ажлын хүрээнд 2021, 2022 оны хөрөнгө, орлого, зарлага, санхүүгийн өр төлбөрийн мэдүүлгээ олон нийтэд дэлгэсэн юм.

2021 онд түүний гэр бүлийн орлого нь цалин, банкны хүү, үл хөдлөх хөрөнгийн түрээсийн орлогыг оролцуулаад 144 мянга гаруй ам.доллар байжээ. Гэхдээ энэ нь 2020 онтой харьцуулахад буурсан үзүүлэлт юм. Тодруулбал, 314 мянган ам.доллараар буурсан байна. Зеленскийн гэр бүлийн 2022 оны эцсийн бэлэн мөнгөний үлдэгдэл ойролцоогоор 47,500 ам.доллараар буурсан байжээ.

"ОХУ манай улсын эсрэг бүрэн хэмжээний түрэмгийлэл явуулж эхэлснээр Украины нутаг дэвсгэр дээрх түрээсийн гэрээг түр цуцалсан. Үүнтэй холбоотойгоор 2022 онд ерөнхийлөгчийн гэр бүлийн орлого буурсан" гэж Украины ерөнхийлөгчийн тамгын газраас тайлбар өгчээ.

Украин улс Европын холбоонд элсэхийн төлөөх хатуу шаардлагыг биелүүлэхийг оролдож байгаа тул ил тод байдлыг нэмэгдүүлэх, авлигыг арилгах ажлыг өргөн хүрээнд явуулж буй. Энэхүү хүчин чармайлтын нэг хэсэг болгон төрийн албан хаагчдыг ч бас орлогоо ил тод болгохыг Зеленский уриаллаа.

Эх сурвалж: UKRAYINSKA PRAVDA