Беларусийн удирдагч Александр Лукашенко ОХУ-ын Санкт Петербург хотноо ерөнхийлөгч Путинтэй уулзжээ. Энэ үеэр тэр Украин болон Балтын орнууд Оростой хамтрахын оронд хилийн чанадаас илүү сайхан амьдрал эрж хайж байна гэж Путинд гомдоллов.

"Миний бодлоор Беларусь шиг улсад аль улс орон ийм боломж олгох билээ? Бид Оростой холбоотой ямар ч асуудал олж харахгүй байна. Орос шиг Беларусийг харж ханддаг улс байхгүй. Украин болон Балтын орнууд бидэн шиг хамтраад ажиллахаар юу нь болдоггүй юм бол? Энэ бол бидний ертөнц. Бид олон арван жил энэ ертөнцийг бүтээсэн. Хамтдаа аймшигт дэлхийн хоёрдугаар дайны ард гарсан. Тэгэхээр энэ чиглэлээ алдалгүй явцгаая. Гэтэл тэд үүнийг хүсэхгүй байна, илүү сайхан амьдралыг хилийн чанадаас хайгаад байна" гэж Лукашенко хэлжээ.

Мөн Украин улс Орос, Беларусьт эргэн нэгдэнэ гэж бодож байна гэв.

Ленинградыг чөлөөлсний 80 жилийн ойд зориулсан хөшөөний нээлтийн үеэр Лукашенко "Хэрвээ Украинаас хэн нэгэн энд байсан бол сайхан байх байлаа. Славяны гурван үндэстэн зовж зүдэрсэн. Гэтэл тэд алга. Бид юу хийж чадах билээ? Өөр замаар явах эсэх нь тэдний сонголт. Гэхдээ тэд эргээд ирнэ гэж би бодож байна. Өөр сонголт байхгүй" гэлээ.

Түүнчлэн Лукашенко Оросын ерөнхийлөгчийг Антарктид руу хамт явахыг санал болгожээ. Оросын туйл судлаачид Антарктид дахь Восток станцад баригдсан өвлийн шинэ цогцолборыг нээсэн. Путин, Лукашенко нар хамтдаа энэ үйл явцыг цахимаар үзжээ.