НЭМЭЛТ:

ЭМЯ-ны Нийтийн эрүүл мэндийн газрын дарга Д.Баярболд:

-Нийслэлийн Баянзүрх дүүргийн 26 дугаар хорооны нутаг дэвсгэрт гарсан ноцтой осолтой холбогдуулан Эрүүл мэндийн яамнаас хоёр үндсэн чиглэлээр ажиллаж байна. Нэгд, иргэдэд эмнэлгийн тусламж үзүүлэх, хоёрт, орчны эрүүл мэндийн асуудал дээр арга хэмжээ авч байна. Шадар сайдын баталсан нийгмийн эрүүл мэндийн ноцтой байдлын үед хариу арга хэмжээ авах, мэдээлэл солилцох журам байдаг. Тухайн осолтой холбоотойгоор эрсдэлийн үнэлгээ хийдэг.

Эрүүл мэндийн яам, Онцгой байдлын ерөнхий газар, БЗД-ийн эрүүл мэндийн төв, ГССҮТ, Цэргийн эмнэлгийн зэрэг зургаан байгууллагын эмч ажилтан хамтран эрсдэлийн үнэлгээг хийлээ. Эрсдэлийн үнэлгээгээр эрсдэл дунд зэрэг гэдэг дүн гарсан.

Эхний үнэлгээ түргэвчилсэн байдаг. Явцын үнэлгээг хариу арга хэмжээтэйгээ уялдуулж, дахин хийнэ. Дэлбэрэлт болсон газар өнөөдөр 08.00-10.00 цагт НЭМҮТ, ОБЕГ-аас шинжилгээ судалгаа хийж үзсэн. Уг шинжилгээгээр агаарт агуулагдаж байгаа 12 нэр төрлийн химийн бодисын найрлага тодорхойлох шинжилгээг тусгай багажаар хэмжлээ. Нийт таван цэгээс буюу Их Монгол хороолол, дэлбэрсэн савны дэргэд, савнаас 10 метр, 50 метрийн зайд тухайн бодисын үлдэгдэл тодорхойлогдохгүйгээр агаарт сарнисан байна. Химийн бодис нь шингэрүүлсэн шатдаг хий буюу агаараас хөнгөн нэгдэл учраас агаарт түргэн хугацаанд ууршсан байна. Иргэдийн эрүүл мэндэд сөргөөр нөлөөлөх вий гэдэг болгоомжлол байгаа байх. Хамгийн гол нь иргэд сэтгэл зүйн цочролд орж байгаа учраас 119 тусгай дугаар ажиллуулж байна. Энэ утсаар зөвлөгөө мэдээлэл авах бүрэн боломжтой. Үйл явдалтай холбогдуулан холбогдох байгууллагууд шуурхай ажиллаж байна. Цаашдаа энэ шинжилгээг давтан хийж, эрсдэлийн үнэлгээг хийнэ. Дэлбэрэлт болсон тухайн газрын бохирдлыг цэвэрлэх, натри хлорын уусмалаар саармагжуулахаар ажиллаж байна. Галд өртөж, шатсан барилгын шаталт бүрэн дуусаагүй байна гэж байгаа учраас ойр орчмын айл өрх цонхоо нээхгүй байх хэрэгтэй.

ХОРДЛОГЫН ШИНЖ ИЛЭРВЭЛ ЭМНЭЛЭГТ ЯАРАЛТАЙ ХАНД

Баянзүрх дүүргийн 26-р хороо, Дүнжингаравын уулзар орчим гарсан ослын талаар Эрүүл мэндийн яамнаас өнөөдөр /2024.01.24/ мэдээлэл өглөө.

ЭМЯ-ны Эмнэлгийн тусламж үйлчилгээний газрын дарга А.ӨНӨРЖАРГАЛ:

-Осол болсон 207-р байранд 56 айл бүртгэлтэй 178 хүн амьдардаг гэсэн мэдээлэл байна.  Эмнэлэгт ирсэн иргэдэд яаралтай тусламж үйлчилгээ, эрчимт, антибиотик, шингэн нөхөн эмчилгээнүүд хийгдээд явж байна. Ийм ослын үед хүмүүс айсан, цочирдсон байдаг учраас эмнэлэгт хэвтэн эмчлүүлж байгаа хүмүүс Сэтгэцийн эрүүл мэндийн төвөөс эмч нар томилж, ажиллуулж байна.  Мөн нийслэлийн түргэн тусламжийн төвөөс дөрвөн баг бэлэн байдалд ажиллаж байгаа бөгөөд хүний нөөц, эм тарианы нөөц бүрэн хангагдсан эрүүл мэндийн салбар бүрэн бүрэлдэхүүнээрээ ажиллаж байна. Мөн Баянзүрх дүүргийн нутаг дэвсгэрт байрлаж байгаа иргэдэд сэтгэц болон эрүүл мэндийн тусламж үйлчилгээ үзүүлж байна. Ийм осол гэмтэл гарахад эрүүл мэндийн салбар бүрэн бүрэлдэхүүнээрээ ажиллаж, шаардлагатай тохиолдолд мэдээ, мэдээллээ солилцоод чиглэл өгөөд ажиллаж байна.

Ийм тохиолдолд аль болох битүү байранд байхгүй байх, сандрахгүй, тайван байж тухайн газраас холдох арга хэмжээг авах хэрэгтэй. Дотор муухайрах, хордлогын шинж тэмдэг илэрвэл шууд эмнэлгийн байгууллагад ажиллах ёстой. Мөн тухайн осол болсон газар эрүүл мэндийн салбарын хяналтын байцаагч, хот тохижилт зэрэг бүх холбогдох албаныхан хөлдсөн газыг арилгаж, цэвэрлэхээр арга хэмжээ авч ажиллаж байна.

Дэлбэрэлт, түймрийн дараа анхаарах зүйлс:

• Дэлбэрэлт, түймрийн үед хорт хийгээр амьсгалж эрүүл мэндэд нөлөөлсөн бол 24 цагийн дотор ханиалгах, амьсгаадах, хоолой сөөх, дотор муухайрч бөөлжих,  толгой өвдөх, нүд, ам, хамар хорсох шинжүүд илэрнэ.  Энэ тохиолдолд Хордлогын Төвд яаралтай хандана уу.
• Дэлбэрэлт, түймрийн дараа ч хэдэн долоо хоногийн турш тэр орчин эрүүл мэндэд аюултай хэвээр байна. Их хэмжээний үнс, барилга, замын материал, төмөр зэргийн хэлтэрхий нь ойр орчмын агаар, хөрс, усыг бохирдуулна. Эдгээр нь амьсгалын замаар орж уушгинд ч хүрэх аюултай. Иймд маск зүүхээ мартаж болохгүй.
• Түүнчлэн дэлбэрэлт, түймрээс үүссэн хар тугалга, асбетс зэрэг химийн хорт бодисууд ойр орчмын барилга доторх хана, шал, тавилга, эд хогшил дээр хуримтлагдах тул чийгтэй цэвэрлэгээг маш сайн хийнэ үү.