Украины Ерөнхийлөгч Владимир Зеленский Давост болж буй Дэлхийн эдийн засгийн чуулга уулзалтын үеэр Хятадын Ерөнхий сайд Ли Цянтай уулзаж чадаагүй. Энэ нь Бээжин Украины дайныг зогсоох хүсэлгүй байгааг харуулж байна гэж "Politico" хэвлэл мэдээллээ.

Чуулганы өмнө Украины Ерөнхийлөгчийн Тамгын газрын дарга Андрей Ермак хэлэхдээ, "Хятад улс энхийн хэлэлцээнд нэгдэх нь зайлшгүй шаардлагатай" хэмээгээд Зеленскийд Хятадын Ерөнхий сайд Ли Цянтай ярилцах боломж олдоно гэж байв. Гэвч "Украин Хятадыг хэлэлцээрт оруулахад ямар ч ахиц гарсангүй, Зеленский, Ли Цян хоёр үг сольж чадсангүй" гэж тэрбээр ярьсан байна.

Энэ нь Хятад улс ОХУ-ын Ерөнхийлөгч Владимир Путины Украины эсрэг явуулж буй өргөн цар хүрээтэй дайныг зогсооход оролцох бодолгүй байгааг харуулж байна гэж "Politico" мэдээлэв. Харин Хятад улс нь Оросын талд орж, цэргийн зориулалтаар ашиглах материалаар хангасан.

"БНХАУ-ын Ерөнхий сайд украинчуудтай уулзахгүй гэсэн шийдвэр нь хуваарийн асуудлаас биш зориудаар шийдвэрлэсэн бололтой. Швейцарийн харилцан айлчлалын үеэр Киевийн уулзалт хийх хүсэлтийг Бээжин хүлээж аваагүй" гэж АНУ-ын өндөр албан тушаалтан мэдэгдэв. Түүнчлэн "Бээжинг Украинтай дипломат харилцаагаа зогсоохыг Оросын талаас шаардсаны дараа Хятад улс ямар ч уулзалт хийхээс татгалзсан" гэж нэрээ нууцалсан албан тушаалтнуудын хэлснээр "Politico" мэдээлэв.

Украины албаны хүн үүнийг үгүйсгэж, Киевийн төлөөлөгчдийн хуваарьт Хятадын албаны хүмүүстэй уулзахаар төлөвлөөгүй гэж мэдэгдсэн. Мөн Киев хэзээ ч ийм уулзалтыг эхлүүлэхийг хүсээгүй гэж мэдэгджээ. Хятадын албаны хүмүүс тайлбар өгөх хүсэлтэд хариу өгөөгүй байна.

Өмнө нь нэрээ нууцалсан Европын холбооны дээд албан тушаалтан хэлэхдээ, Европын холбооноос  Хятадыг Зеленскийтэй шууд харилцаагаа сэргээхийг уриалж, "Швейцарьт Хятадын Ерөнхий сайдтай уулзах нь эерэг алхам болно" гэж хэлж байв.

Оросууд түрэмгийлснээс хойш хоёр улс тодорхой дипломат алхмуудыг хийсэн гэдгийг “Politico” онцолжээ. Тухайлбал, Зеленский, БНХАУ-ын удирдагч Ши Жиньпин нар өнгөрсөн дөрөвдүгээр сард утсаар ярьж,  дараа сард нь Украин дахь БНХАУ-ын Элчин сайд Киевт айлчилсан. "Украин хоёр тал яриа хэлэлцээг дахин эхлүүлнэ гэж найдаж байгаа хэдий ч тэр цагаас хойш харилцаа холбоо харьцангуй багассан" гэж Politico тэмдэглэв.

Зеленский, БНХАУ-ын Ерөнхий сайд нар Давост хүрэлцэн ирж, гадаадын түншүүдтэйгээ уулзаж, форумын өндөр түвшний үзэгчдэд үг хэлэв. Тэд тэс өөр мессежийг хүргэсэн. Ли Цян Хятадыг эдийн засгийн хүндрэлтэй байсан ч хөрөнгө оруулалт хийх найдвартай газар гэж танилцуулжээ. Харин Зеленский Путиныг шүүмжилж, Украины төлөө холбоотнуудаа нэгтгэсэн.

ЭХ СУРВАЛЖ: POLITICO, UKRAYINSKA PRAVDA