Хүний их эмч, анагаах ухааны доктор Г.Ууганцэцэг, анагаах ухааны эрхзүйч, доктор Э.Ганбат нар өнөөдөр /2024.01.17/ агаарын бохирдлын талаар мэдээлэл хийлээ. Тэдний зүгээс нийслэлчүүдийн эрүүл аюулгүй орчинд амьдрах эрх зөрчигдсөөр байхад холбогдох төрийн байгууллагууд нь эс үйлдэл хийж байгааг эсэргүүцэж, Засгийн газрыг шүүхэд өгч, нөхөн олговор шаардаж байна гэв.

Хүний их эмч, анагаах ухааны доктор Г.Ууганцэцэг:

-Угаарын хийн хордлогоор нас барсан хүмүүсийн тоог шүүх шинжилгээний статистикаар сүүлийн долоон жилийн хугацаанд 745 хүн агаарын хийн хордлогод өртөж нас барсан байна. Энэ зөвхөн нас барсан хүний тоон үзүүлэлт. Өнгөрсөн 2023 онд 2679 хүн угаарын хийн хордлогод өртөж, 57 хүн нас барсан байна. Үлдсэн 2622 хүн нь ямар нэгэн байдлаар хордлого тайлах, нөхөн сэргээх эмчилгээ хийлгэсэн гэсэн үг. Харин нас барсан иргэдэд нөхөн төлбөр олгоогүй.

Хүүхдийн өвчлөл, эндэгдлийн тэргүүлэх шалтгааныг ч дээрх шалтгаан эзэлж байна. Зөвхөн 2023 оны сүүлээр 0-5 насны 961 хүүхэд эндсэн бол 0-1 насны 793 хүүхэд бүртгэгдсэн. Эдгээр хүүхдүүдийн нас баралтын тэргүүлэх шалтгааныг мөн л амьсгалын замын өвчлөл эзэлж байна. Энэ бол зөвхөн нэг жилийн хугацаанд төрийн эс үйлдлийн уршгаар нас барсан хүүхдийн тоо. Сургууль, цэцэрлэг эхэлсэн цагаас ханиад тусч, эрүүл мэнд, санхүүгээр хохирсон тоог тооцвол явж өгнө. Тэдний ирээдүйд учрах эрүүл мэндийн эрсдэлд бүр ч их анхаарал татаж байна. Тиймээс өнөөдөр Засгийн газарт дараах шаардлагыг хүргүүлж байгаа юм.

Анагаах ухааны эрхзүйч, доктор Э.Ганбат:

-Утааны улиралд хүүхэд бүр жилд 4-5 удаа ханиад хүрдэг. Нэг удаагийн ханиаданд нэг хүүхдэд 200-300 мянган төгрөг зарцуулдаг дундаж тооцоолол бий. Тэгвэл эцэг эхчүүд нэг хүүхдэд жилд 1-1.2 сая төгрөг зарцуулдаг байна. Энэ мөнгөн дүнтэй дүйцэхүйц нөхөн олговрыг 0-5 насны Монголын бүх хүүхдэд олгохыг шаардаж байна. Уг нөхөн олговрыг олголоо гэж тооцоход 440 тэрбум төгрөг болно. Энэ мөнгө хүүхдийн эрүүл мэндийг нөхөхгүй ч эрүүл амьдрах орчныг нь бүрдүүлж өгч чадаагүйн төлөөст төлөх ёстой. Нүүрсний хулгайн 40 их наядаас 100 дахин бага мөнгө. Мөн төр засаг 10 жилийн хугацаанд утааг бууруулахад нэг их наяд төгрөгийг зарцуулсан. Гэвч ямар ч үр дүн гарсангүй. Хариуцлага хүлээсэнгүй гэв.

Гэрэл зургийг О.Болорсувд