Өмнөд Солонгосын алдарт дуучид Монголд тоглолтоо хийнэ

Өмнөд Солонгос улсын алдартай дуучид Монголд тоглолтоо хийх гэнэ. Тодруулбал, алдартай дуучид болох MC Sniper, Bloo, Kim hyun joong /F4/ нар Монголд ирж, гэгээн хайрын өдрийг тохиолдуулан хамтарсан тоглолтоо хийх гэж байна. Тэдний тоглолт ердөө ганцхан удаа буюу 2024 оны хоёрдугаар сарын 17-нд "Буянт-Ухаа" цогцолборт болно.

Монголчууд алдарт дуучин, жүжигчин Kim Hyun Joong-ийг "F4″ уран сайхны киноны дүрээр нь сайн мэднэ. Тэрбээр 2005 оноос уран бүтээлийн гараагаа эхлүүлж, "Your Story", "Break Down", "Because I’m stupid" зэрэг дуугаараа алдаршсан юм.

Тоглолтод уран бүтээлч Чойжоо болон "Vandebo", "Gangbay" зэрэг хамтлаг, дуучид оролцох бөгөөд энэ жилийн гэгээн хайрын баярын хамгийн том фестиваль гэдгээрээ онцлог.

Энэ тоглолт нь Монгол, Өмнөд Солонгосын соёлын харилцааны хүрээнд зохион байгуулж байгаа бөгөөд цаашид жил бүр Солонгосын алдарт дуучид, хамтлаг Монгол Улсад тоглолтоо хийхээр төлөвлөж байгаа аж.