УИХ-ын намрын чуулган энэ долоо хоногийн Баасан гаригт хаалтаа хийнэ. Ингэснээр 76 гишүүнтэй парламентын сүүлчийн ажил ихтэй чуулган өндөрлөж байна гэсэн үг.

Учир нь ирэх зургадугаар сарын 28-нд УИХ-ын сонгуулийн чуулгантай учир хаврын чуулган “аргацаагаад” дуусгах болов уу. УИХ-ын гишүүд нь намрын чуулганыг дуусгах хүсэлтэй, ойрын өдрүүдэд чуулган, байнгын хороо ирц хүрэхгүй, УИХ-ын даргын уурыг хүргэж буй. УИХ-ын гишүүдийн хувьд чуулганы завсарлагааны хугацаанд тойрогтоо ажиллах хүсэлтэй байгаа.

Одоо л тэд сонгогчдодоо өнгөрсөн дөрвөн жил хийсэн ажлаа танилцуулж, дахин сонгогдох хүсэлтээ,  тойргоо зорих гишүүд, нэр дэвшигчид одоо л сонгогчдоо ямар их санаснаа илэрхийлнэ.

Гэхдээ энэ удаагийн сонгууль нэр дэвшигчдээс “олон” зүйл шаардана. Гурван аймгийг нэг тойрог болгож байгаа учраас өмнө нь нэгхэн аймгийн сонгогчдоо тойглодог байсан нэр дэвшигчид энэ удаад гурван аймаг, дүүргийн сонгогчдыг тойглох шаардлага үүсч буй. Бүсчилсэн том тойргоор сонгууль зохион байгуулагдаж, сурталчилгааны өдрүүд цөөхөн учраас одоо л УИХ-ын гишүүд тойрогтоо ажиллаж, сонгогчдодоо санасан сэтгэлээ илэрхийлнэ. Тухайлбал, өмнө нь ганцхан Булган аймгаас сонгогдсон гишүүд гэхэд энэ удаагийн сонгуулиар Хөвсгөл, Эрдэнэ хотын сонгогчдыг “тойглох” шаардлага гарч буй. Мэдээж одоо УИХ-ын гишүүн, сайд, ямар нэг албан тушаал эрхэлж буй хүмүүст бүсчилсэн тойрог боломжтой бөгөөд шинэ нэр дэвшигчдэд тойрогтоо танигдаж амжихгүй байх нөхцөл бий болсон. Тиймээс одоо л гишүүд тойрогтоо танигдаж, олонд танигдах цаг үе нь.

126 гишүүнтэй болохын тулд бид багадаа 1000 орчим нэр дэвшигчид нэр дэвших болов уу гэсэн таамаглал бий. Хамгийн сүүлийн сонгууль буюу 2020 оны УИХ-ын сонгуульд 600 орчим нэр дэвшигч дэвшиж байсан учраас энэ удаад илүү олон нэр дэвшигч дэвших болов уу гэсэн таамаг бий.

Нэг тойрогт 3-10 мандаттай учраас зөвхөн нэг намаас л ийм тооны нэр дэвшигч дэвшинэ.

Одоо бидний, сонгогчдын хэрсүү байх цаг. Нэр дэвшихээр горилж байгаа хүн, нам бидэнд амандаа орсноо, зөвхөн сонгогчдын саналыг татах, таалагдах зүйл ярьж, танилцуулна. Ялангуяа сонгуулийн жилийн төсвөө баталчихсан, тэтгэвэр нэмж, цалингийн доод хэмжээг нэмэгдүүлнэ гээд сайхан амлалтууд биднийг хүлээж буй. Тиймээс эмээ, өвөө нар нь үр хүүхдийнхээ ирээдүйг өнөөдрийн эрх баригчдын өгсөн тэтгэврийн нэмэгдлээр солихгүй байх нь нэн чухал. Залуучууд нь ч гэсэн сонгуульдаа идэвхтэй оролцож, зөвхөн өөрсдийнхөөрөө сонголтоо зөв хийх хариуцлагатай цаг үе. Бидний өнөөдрийн утаа, авлига, төрд нүүрлэсэн хулгайд сонгогчид бид өөрсдөө ч гэсэн буруутай. Халамж горьддог саналаа худалддаг  байдал эргээд бидний өнөөдрийг бий болгож байгааг судлаачид онцолдог. Сонгогчид сонгуульдаа идэвхтэй оролцож, саналаа худалдахгүй, сонголтоо зөв хийх нь чухал юм.

Нэгэнт чуулган завсарласан учраас тойргоо зорих гишүүд сонгогчдод “гайхалтай” зүйл амлаж, амандаа орсноо л амлана. Тиймээс тэдэнд хууртахгүйгээр, хэрсүү байж, сонгуульдаа идэвхтэй оролцох хариуцлагатай сонгууль биднийг хүлээж байна.