Уламжлалт цагаан сарын баярын өдөр буюу XVII жарны "Хилэнт эх" хэмээх модон луу жилийн шинийн 1-ний өдөр 2024 оны хоёрдугаар сарын 10-нд тохионо. Гэхдээ битүүний өдөр тасарч байгаа. Энэ талаар "Түвдэнпэлжээлин” хийдийн хамба лам Ж.Гончигсүрэнгээс тодруулахад "Энэ жилийн цагаан сарын баярын битүүний өдөр тасарсан гэх мэдээлэл үнэн. Гэхдээ энэ жил аргын тооллын хоёрдугаар сарын 9-н буюу хуучны 29-нд сүм хийдүүд битүүний өдрийн хурал номоо хурна. Ард иргэд тэр өдөр битүүлэг хийх зан үйлээ хийж болно" гэв.

Битүүний өдөр тасарч байгаа учир уламжлалт сар шинийн барилдаан болох эсэх талаар бөх сонирхогчид сонирхож байлаа. Тэгвэл энэ талаар Бөхийн холбооноос тодруулахад "Барилдаан болно" гэсэн юм.

Өнгөрсөн жилийн тухайд улсын заан Б.Бат-Өлзий түрүүлж, даян аварга Н.Батсуурь үзүүрлэсэн билээ. Харин 2022 оны усан бар жилийн барилдаанд аймгийн заан цолтой байсан Э.Мөнхжаргал түрүүлж, улсын заан Б.Пүрэвсайхан үзүүрлэсэн түүхтэй. Үүнээс өмнө цар тахлын улмаас 2021, 2020 онуудад битүүний өдрийн уламжлалт барилдаан цуцлагдсан.

Усан туулай жилийн барилдаанд Ч.Санжаадамба аварга зодоглож, ард түмнээ баярлуулсан удаатай. Түүний хувьд хэсэг хугацаанд дэвжээнээсээ хөндийрч эргэн ирсэн нь энэ байсан. Тэгвэл энэ жил түүнийг барилдаасай гэж бөх сонирхогчид хүсч байна.