Ёкозүна Тэрүнофүжи Г.Ган-Эрдэнэ ирэх амралтын өдөр эхлэх Хацү башёд барилдахаар болжээ. Түүний хувьд сүүлийн гурван башё дараалан бэртлийн улмаас өнжиж, бүтэн барилдаж чадаагүй.

Өдгөө 32 настай их аваргын тухайд өнгөрсөн тавдугаар сарын Нацү башёд түрүүлснээсээ хойш Нагоя башёг нурууны бэртлийн улмаас дундаас нь орхиж, Аки болон Кюүшү башёд барилдаагүй билээ. Угтаа Тэрүнофүжи Г.Ган-Эрдэнэ удаан хугацаанд зовиуртай байсан өвдгөндөө хагалгаа хийлгэн эргэн дэвжээнээ гараад байсан юм.

Дэвжээний багш Исэгахама ярихдаа “Түүний бэлтгэл төдийлөн сайн биш байгаа ч тэр барилдах хүсэлтэй байгаа. Миний харж байгаагаар түүнийг эхний барилдаанаа хийх хүртэл би нөхцөл байдлынх нь талаар хэлмээргүй байна. Тэр өөрийгөө сайн байгаа гэж байгаа боловч өмнөхөө бодвол бэлтгэл дээрээ харьцангуй цөөн барилдаан хийж байна” гэжээ.

Өнгөрсөн оны арваннэгдүгээр сард сүмогийн холбооны ёкозүнагийн зөвлөл хуралдах үеэр зөвлөлийн зарим гишүүд Тэрүнофүжи Г.Ган-Эрдэнийг Хацү башёд барилдахыг “шахжээ”. Ерөнхийдөө Тэрүнофүжи Г.Ган-Эрдэнэ цаашдаа дахин башё өнжөөд байвал зодог тайлахаас өөр аргагүйд хүрнэ. Сүүлд Какүрюү М.Ананд дөрвөн башё бүтэн барилдаж чадалгүй ёкозүнагийн зөвлөлөөс барилдахыг сануулж, эцэст нь зодог тайлах хүсэлтээ өгч байсан билээ. Тиймээс Тэрүнофүжи Г.Ган-Эрдэнэ үргэлжлүүлэн барилдаж чадна гэдгээ харуулахын тулд ирэх башёд зодоглоно.