Нийслэлийн 14 байршилд халиа үүсээд байгаа талаар хотын дарга Х.Нямбаатар Сэлбэ гол дээр ажиллах үеэрээ мэдээлэв. Албаныхнын өгсөн мэдээллээр энэ өвөл голын ай сав газруудаар халиа үүсэх үзэгдэл харьцангуй эрт эхэлж, байнгын урсацтай булаг, хөрсний уснаас халиа тошин үүсэн, ойр орчмын айл өрхүүдийн гэр, хашаа байшин усанд автан хөлдөж, зам талбайд халтиргаа гулгаа үүсгэж байна. Мөн голын далан, гүүр, дулааны шугам сүлжээнд гэмтэл үүсгэх эрсдэл үүсээд байгаа юм. Иймд халиа тошин үүссэн байршлуудад Геодези, усны барилга, байгууламжийн газраас шуурхай баг өдөр бүр ажиллаж байгаа аж.

Энэ талаар Хотын дарга Х.Нямбаатар:  

-Сэлбэ, Туул, Дунд гол, Нарангийн гол ай сав газруудаар халиа үүссэн. Эдгээр хамгийн өндөр эрсдэл үүсгэж байгаа зургаан байршил байгаа. Сэлбэ голд өмнөх жилүүдийн дунджаас 20 орчим см илүү халиа үүссэн байна. Захирагчийн ажлын алба, Геодези, усны барилга, байгууламжийнхан сувагчлах ажлуудыг хийж байгаа. Мэргэжилтнүүдийн зүгээс нэг, хоёрдугаар сар халиа үүсдэг оргил үе байдаг. Гуравдугаар сараас эхлэн суулт өгч эхэлдэг гэх мэдээлэл өгсөн. Тэдний зөвлөгөөгөөр мөс зөөвөрлөх ажлыг хэт их хийвэл гурав, дөрөвдүгээр саруудад хуурайшилт явагдах магадлалтай. Тиймээс бид голын ай сав газруудын далан болон гүүрэн байгууламжуудад эвдрэл өгөхөөс урьдчилан сэргийлэх зорилготой суваглал хийж байгаа. Байнгын хяналт тавин ажиллаж байна. Шаардлагатай тохиолдолд холбогдох албаныхан сувагчлах ажлыг цаг тухайд нь хийгээд явж байгаа гэдгийг иргэддээ хандаж хэлье. Хавар шар усны үерээс урьдчилан сэргийлэх чиглэлээр нийслэлийн Засаг даргын захирамжууд гарахаар төлөвлөгдсөн гэлээ.