Шведийн Батлан хамгаалахын яамны хоёр дээд албан тушаалтан иргэдийг дайнд бэлтгэлтэй байхыг сануулжээ. Тодруулбал, Иргэний батлан хамгаалахын сайд Карл-Оскар Болин хэвлэлийн бага хурлын үеэр "Шведэд дайн болж магадгүй" гэж хэлсэн. Түүний дараа цэргийн ерөнхий командлагч генерал Микаэль Байден "Бүх швед хүн ийм зүйлд сэтгэл санааны бэлтгэлтэй байх хэрэгтэй" гэжээ.

Гэвч сөрөг хүчний улстөрчид уг сэрэмжлүүлгийн өнгө аясыг шүүмжилж байна. Ерөнхий сайд асан Магдалена Андерссон хэлэхдээ "Аюулгүй байдлын асуудал ноцтой байгаа ч гэлээ дайн юу юугүй хаалганы гадаа ирчихээгүй байна" гэв.

Шведийн үндэсний хэмжээний тусламжийн утсанд дайнтай холбоотой дуудлага бараг ирдэггүй. Гэтэл энэ долоо хоногт дайн болох вий гэж санаа зовсон залуу хүмүүсийн дуудлага иэхссэнийг Хүүхдийн эрхийн байгууллагаас мэдээллээ. Залуус хүүхдүүд Тикток платформоос энэ төрлийн мэдээллийг авсан гэжээ. Томчуудад зориулсан мэдээлэл гаргахдаа хүүхдүүдийг ч бас бодолцох ёстой байсан гэсэн байр суурийг тус байгууллагаас илэрхийлэв.

Илэрхийлэх арга нь ширүүн байсан ч батлан хамгаалахын албан тушаалтнуудын хэлсэн үг анхаарч, сэрэмжлэх ёстой зүйл мөн. Хоёр зууны турш энх тайван оршсон Швед улс НАТО-д элсэхээр өнгөрсөн онд өргөдлөө өгсөн. Өдгөө Турк, Унгарын зөвшөөрлийг хүлээж байна.

Генерал Микаэль Байден өөрийнхөө мэдэгдлийг цоо шинэ зүйл биш гэжээ. Тэр саяхан Украины зүүн фронтод айлчлаад ирсэн билээ. "Би хүмүүсийн санааг зовоох зорилгоор хэлээгүй. Хүмүүс өөрсдийнхөө нөхцөл байдал, үүрэг хариуцлагын талаар илүү их бодоосой гэсэндээ хэллээ" гэв. Харин Батлан хамгаалахын сайд Карл-Оскар Болин "Шөнийн нойрыг минь хугаслаж буй ганц зүйл юу вэ гэвэл үйл явц маш удаан байгаа явдал" гэжээ. Тэрбээр энэ үгээрээ НАТО-д элсэх үйл явцыг дайруулан хэлсэн бололтой.