"Баавгай болох сон" уран сайхны киноны уран бүтээлчид өнөөдөр /2024.01.11/ мэдээлэл хийлээ.

Найруулагч П.Золжаргал:

-"Баавгай болох сон" уран сайхны киноны зохиолын санаа 2017 оны нэгдүгээр сард анх төрсөн. Тэрнээс хойш зохиол хөгжүүлэлт, хөрөнгө босгох урт аяныг давж, 2022 оны нэгдүгээр сард зураг авалт эхэлсэн. Нийт гурван сарын хугацаанд үргэлжилж, 2023 оны хоёрдугаар сард бүрэн дууссан. Тэгээд анхны Каннын олон улсын наадмыг зорьсон. Уран сайхны киног маань 80 гаруй хувь хүн, 20 гаруй албан байгууллага, олон улсын байгууллагө, хувийн хэвшлүүд дэмжин ажилласан. Зураг авалтыг хотын гэр хороолол болох Дэнжийн мянга орчимд хийж, 30 хүний бүрэлдэхүүнтэй ажилласан юм. Харин киноны өнгө засах, дууны найруулг, эвлүүлгийг Парис хотод хийсэн. Энэ кинонд Монгол, Франц, Швейцарь, Катар гэсэн дөрвөн улсын уран бүтээлчид хамтран ажилласан. Уран сайхны киноны гол дүрд 15 настай физикийн хичээлд асар сонирхолтой, эрч хүчтэй, өсвөр насны хүү болон түүний гэр бүл, одоогийн нийгмийн үнэн бодит байдлыг харуулахыг зорьсон.

"Баавгай болох сон" кино Монголдоо нээлтээ хийж, 2024 оны нэгдүгээр сарын 12-ноос бүх кино театруудад гарч эхэлнэ.

Хүүхдүүд ядуу нөхцөл байдалд амьдарч байгаагаас болж ямар олон боломжоос хоцорч байгааг харуулна. Мөн агаарын бохирдол, ажилгүйдэл, архидалт, гэр бүлийн хүчирхийлэл гэх мэт асуудлыг харуулахын зэрэгцээ шийдлийг гаргаж ирсэн кино болсон. Чанартай сайн боловсролын тухай өгүүлнэ. Өлзийбат хүү физикийн олимпиадад оролцож, алтан медаль авч мундаг хүн болохын төлөө зүтгэдэг. Ядууралд өртсөн айлын хүүхдүүд маш их хичээл зүтгэл гаргаж, золиос гаргаж байгаа талаар өгүүлнэ. Хүүхдүүд ямар ч нөхцөл байдалд байсан үргэлж сайн сайхныг хүсч мөрөөддөг. Тэгэхээр уран сайхны кино маань хүүхэд насны баяр жаргалын тухай өгүүлсэн гэдгийг онцолъё.

Сайн багш хүн хүнд нөхцөлд амьдарч байгаа хүүхдийг олж хараад зөв замыг нь зааж чаддаг юм. Сургуулийн орчин хүүхдэд ээлтэй, итгэл найдвар өгдөг газар гэдгийг харуулахыг хүссэн. Өчигдөрхөн манай кино Франц улсад нээлтээ хийж, 100 кино театрт гарч эхэллээ. Мөн Швейцарь улсын 27 кино театрт гарч байгаа. Цаашлаад Англи, Тайван, Итали, Австри, Германд нээлтээ хийхээр төлөвлөөд байна. Энэ кино бол монголчуудын түүх. Энэ киног үзсэнээр хамгийн их итгэл найдварыг хаана өгөх вэ, хамгийн их өөрчлөлтийг хаана авч ирэх вэ гэхээр миний эх орон. Монгол дахь нээлтээ догдлон хүлээж байна. Кино маань агаарын бохирдлын асуудлыг хөндөж байгаа учраас өвлийн улиралд нээлтээ хийхээр төлөвлөсөн. Би өөрөө гэр хороололд амьдардаг учраас гэр хорооллынхон хэрхэн өвлийг даван гардаг тухай сайн мэднэ. Тийм учраас хэн нэгнийг хордуулах гэж тэдгээр хүмүүс нүүрс түлдэггүй гэдгийг ойлгуулахыг хүссэн" гэсэн юм.