Иргэдийн шүүх, цагдаа, прокурор, Авлигатай тэмцэх газрынханд итгэх итгэл алдарсаар байна. Товчхондоо бол Д.Сумъябазарыг “ногоон” автобусны хэргээс сугалж үлдээснээр АТГ улстөрчдөд үйлчилдэг гэдгээ баталчихлаа. Тус газраас  “но ногоон”-той хэргийг гурван сар гаруй хугацаанд шалгасны эцэст эзэн холбогдогчдыг нь шүүхэд шилжүүлэхэд бэлэн болсон гэдгээ өчигдөр /2024.01.09/ зарласан. Ингэхдээ ногоон автобуснуудыг үйлдвэрийн технологийн бус аргаар угсарч хийсэн гэдгийг тогтоогоод байгаа.

Хохирол 134.5 тэрбум төгрөг бөгөөд үүнээс мөрдөгчид 11.9 тэрбум төгрөгийг төлүүлж, 71.7 тэрбум төгрөгийн хөрөнгийг битүүмжлэн хамгаалжээ.

АТГ өнгөрсөн 2023 оны аравдугаар сараас эхлэн 141 хүнийг гэрчээр дуудаж байцаасан. Улмаар Түгжрэлийн сайд асан Ж.Сүхбаатар тэргүүтэй 27 албан тушаалтан оролцсон нь хөдөлшгүй баримтаар тогтоогдсон гэдэг мэдээлэл бий. Тэдний дунд УИХ-ын гишүүн Ж.Сүхбаатараа өөр төрийн өндөр албан тушаалтан байхгүй. Нийтийн тээврийн газрын дарга асан С.Жавхлантбаатар, Худалдан авах газрын дарга асан Б.Түмэнжаргал тэргүүтэй төрийн албан хаагчид багтав. Үүнээс гадна “Тэнүүн-Огоо” компанийн захирал А.Ганхуяг, Солонгосын дөрвөн иргэн тэргүүтэй автобус нийлүүлсэн нөхөд байна. Хамгийн сонирхолтой нь хотын дарга асан Д.Сумъяабазар шүүхээр орох албан тушаалтнуудын байхгүй бөгөөд түүний зөвлөх асан Д.Мөнх-Эрдэнийг яллагдагчаар татжээ.

Шалгагдаж байгаа хүмүүсийг харахад, бараг бүгд Согинохайрхан дүүргийн гаралтай, Д.Сумъябазарын татаасны хүмүүс байгаа. Нэг ёсны Сонгинохайрхан дүүргийн мафийнхан хотын нийтийн тээврийн парк шинэчлэлийн мөнгийг залгисан болж таараад байгаа. Ямар хүн ч хар ухаанаар бодсон энэ бол хөдлөшгүй үнэн.

Түгжрэлийн сайд Ж.Сүхбаатар өнгөрсөн аравдугаар сард албан тушаалаасаа огцрох үедээ автобус худалдан авах тендерийн эрхийг нийслэлийн Засаг даргын тамгын газарт шилжүүлсэн гэж ил цагаан хэлдэг.

Тэгвэл хотын дарга асан Д.Сумъяабазар “Тэнүүн-Огоо” компаниас хуучин автобус худалдаж авсан дуулианаар огцрох үедээ Засгийн газрын Хэрэг эрхлэх газрын дарга Д.Амарбаясгалангаар зуучлуулан анх А.Ганхуяг гэдэг хүнтэй уулзсан гэж хэлсэн. Харин Д.Амарбаясгалан үүнд тайлбар хийхдээ, А.Ганхуяг гэдэг хүнтэй уулзаж байгаагүй. Түүнийг Дарханаас гаралтай улстөрчид ивээлдээ байлгадаг гэх үг унагаасан юм. Гэтэл “Тэнүүн-Огоо”-гийн “но-той ногоон” автобуснаас болж, ёс зүйн хариуцлага хүлээж буй нэрээр үтэр түргэн ажлаа өгсөн нийслэл Улаанбаатар хотын авто замын түгжрэлийг бууруулах үндэсний хорооны дарга Ж.Сүхбаатар Дархан хотоос гаралтай улстөрч байж таарсан.

Ийнхүү Түгжрэлийн сайд Ж.Сүхбаатар, хотын Д.Сумъяабазар нар ёс зүйн хариуцлага үүрч, албан тушаалаасаа огцорсон ч хулгайн хэрэгтээ ял зэмгүй явсаар байгаа юм. Уг нь өнөөгийн хотын дарга Х.Нямбаатар “ногоон” автобусны бүх бичиг баримтыг АТГ-д хүлээлгэн өгсөн гэж мэдэгдсэн байдаг.