Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах хууль өнөөдөр /2024.01.08/-өөс хэрэгжихээр УИХ-аас баталсан. Гэвч хууль хэрэгжиж эхлэх болоогүй байна. Энэ талаар албаныхнаас тодруулахад, Монгол Улсын Ерөнхийлөгч У.Хүрэлсүхийн хуульд хориг тавих хугацаа 2024 оны нэгдүгээр сарын 6-нд дууссан. Амралтын өдөр таарсан тул Ерөнхийлөгчийн хориг тавих эсэх хариуг хүлээж байна" гэв.

Хэрэв Ерөнхийлөгч хуульд хориг тавихгүй бол хууль Төрийн мэдээлэл сэтгүүлд хэвлэгдэж, албан ёсоор хэрэгжиж эхэлнэ. Мөн үүний дараагаар хуулийг дагалдах журмуудыг боловсруулах юм.

Хотын даргын Төсөл хөтөлбөр хариуцсан зөвлөх Ч.Батзориг өмнө нь мэдээлэл хийхдээ "Хуулийн дагуу Монгол Улсын Ерөнхийлөгч У.Хүрэлсүхэд Түгжрэлийн тухай хуулийн төслөө өргөн барьсан. Ерөнхийлөгчийн хориг тавих хугацаа 2024 оны нэгдүгээр сарын 6-нд дуусна. Үүний дараагаар албан ёсоор хэрэгжиж эхэлнэ. Хуулийн хүрээнд зарим нэг өөрчлөлтийг хийсэн. Тээврийн хэрэгслийн цахим гэрчилгээтэй холбогдуулан хэд хэдэн анхаарах зүйлс бий.

Хуучин үзлэг оношилгоонд орсон, татвараа төлсөн тээврийн хэрэгслийг хөдөлгөөнд оролцуулж, бусад торгууль, төлбөрийн асуудалд хуулийн зохицуулалт байхгүй байсан. Энэ удаа шинэ хуулийн зохицуулалт орж, агаарын бохирдлын төлбөр, зам болон замын байгууламжийн төлбөрийг төлөөгүй, замын хөдөлгөөний аюулгүй байдлын эсрэг зөрчил гаргаж, торгууль оногдуулсан тээврийн хэрэгслийг замын хөдөлгөөнд оролцуулахгүй байх шинэ заалтыг оруулсан" гэдгийг онцолсон юм.

Өөрөөр хэлбэл, жолооч Түгжрэлийн тухай хууль хэрэгжиж эхэлснээс хойш торгуулиа бүрэн төлсөн байхыг шаардана. Ингэснээр замын хөдөлгөөнд оролцоно гэж ойлгож болно.

Мөн тэрбээр "Та өнөөдөр хэдэн төгрөгийн торгууль авсан байна тэр торгуулийг сайн дураараа төлөх 15 хоног нь хэтэрсэн бол хязгаарлана. Харин 15 хоног дотроо замын хөдөлгөөнд оролцож байгаа тээврийн хэрэгслийг торгуультай гэж үзэхгүй. Хэдэн төгрөгөөс дээш бол хязгаарлана гэж байхгүй. Энэ зохицуулалттай холбоотой түр журмыг батлах байх. Өмнөх оных байна уу, энэ оных байна уу та хуулийн 15 хоногоос хэтэрсэн торгуультай л бол хөдөлгөөнийг хязгаарлана. Статистик мэдээллээр өнөөдрийн байдлаар нийт 728 мянган машин замын хөдөлгөөнд оролцож байна. Эдгээрээс 436 мянган автомашин торгуультай байна. Шинэ оны гарсны дараахан Түгжрэлийн тухай хууль хэрэгжих гэж байгаатай холбоотойгоор жолооч нар татвар, торгуулиа идэвхтэй төлж байна гэх мэдээлэл ирсэн" гэв.