Өмнөд Солонгосын нэрт жүжигчин Ли Сюн Кун хар тамхины хэрэгт холбогдон, шалгагдаж байсан ч өнгөрсөн оны арванхоёрдугаар сарын 27-ны өдөр Сөүл хотод машин дотроо амиа хорлосон олдсон билээ. Хар тамхи хэрэглэсэн эсэх нь бүрэн тогтоогдоогүй байхад олон нийт түүнийг дур мэдэн шүүж, шийтгэсээр эцэст нь тэрээр хатуу нийгмийн золиос болсон гэж үзэж буй. Түүнийг арванхоёрдугаар сарын 29-нд эцсийн замд нь үдсэн.

Тэгвэл талийгаачийг шантаажилж, мөнгө завшсан гэх эмэгтэйчүүдийн нэгнийх нь царай төрх саяхан ил болжээ. Тодруулбал, арванхоёрдугаар сарын 30-ны өдөр "Caracula Crime Lab" нэртэй "YouTube" суваг тус эмэгтэйн гурван зургийг нийтэлсэн байна. Энэ нь 28 настай Пак Со Жун гэдэг эмэгтэй байжээ. Пак Со Жун өмнө нь жүжигчнээр ажиллаж байсан бөгөөд өрх толгойлсон ээж. 

"Caracula Crime Lab"-ын мэдээлснээр Пак Со Жун нь Ким Нам Хи гэх эмэгтэйтэй нэг байранд амьдардаг аж. 

Хоёр эмэгтэй хоёулаа талийгаачаас 350 сая вон авсан хэргээр шалгагдаж байна. Ким Нам Хи нь Пак Со Жуныг танихгүй гэж мэдэгджээ. Гэхдээ "Caracula Crime Lab"-д мэдээлснээр тэд шоронд анх танилцсан бөгөөд тус тусын ялаа эдэлснийхээ дараа нэг байранд хөрш болсон байна. 

Өөр нэгэн эх сурвалжид Пак Со Жуныг 20-30 насныхны дунд түгээмэл хэрэглэгддэг гар утасны апликейшн ашиглан луйвраа хийсэн гэж бичжээ. Тэрбээр уулзсан эрчүүдтэйгээ болзож, бэлгийн харьцаанд орсныхоо дараа жирэмсэн болсон гэж хэлээд, хүүхдийн тэтгэмж шаарддаг байсан гэв. Со Жун өнгөрсөн оны нэгдүгээр сард хүүхэдтэй болсон бөгөөд хүүхдийнхээ төрсөн эцгээр тогтохгүй апликейшнээр дамжуулан танилцсан бусад эрчүүдээс ч тэтгэмж нэхсэн байна. Ойролцоогоор таван эрэгтэй түүний хохирогч болсон. Улмаар эрчүүдийн нэг нь эцэг тогтоох шинжилгээ хийлгэснээр Со Жун худал хэлж байгаа нь тогтоогджээ. Мөн Со Жуныг залилангийн хэргээр шүүхэд өгөөд байжээ. 

Эх сурвалж: TODAY ONLINE