Монгол Улсын Засгийн газраас цахим үндэстэн болох зорилго тавьж, үе шаттайгаар төрийн үйлчилгээнүүдийг иргэдэд оочер дараалалд зогсохгүйгээр авах боломжийг бүрдүүлж буй. Төрөөс авах боломжтой нийт 1170 үйлчилгээг өнгөрсөн гурван жилийн хугацаанд иргэд E-Mongolia платформоор дамжуулж авсан байна.

E-MONGOLIA 4.0 ХУВИЛБАР УДАХГҮЙ АШИГЛАЛТАД ОРНО

Цаашид ч энэ үйлчилгээг сайжруулж, системийн шигэчлэлт хийж хүндрэл, сааталтай асуудлуудыг шийдвэрлэнэ гэдгийг Цахим хөгжил, харилцаа холбооны яамнаас мэдээлсэн. Бид энэ талаар E-Mongolia платформын хэвлэлийн албанаас тодрууллаа.

E-Mongolia систем динамик хэлбэртэй болсноор ачаалал ихтэй үед ачааллыг даахаас гадна хэрэглэгч бага хандаж байгаа тохиолдолд ачааллын хурдыг бууруулах боломжтой болсон.

2022-2023 онд хэрэглэгчдэд тулгамдаж байсан асуудлууд дээр тулгуурлаж хамгийн эхэнд ачаалал даах чадварын системд шинэчлэн оруулсан байгаа. Мөн аппликейшний дизайнаа сайжруулж, хэрэглэгчдэд илүү ойлгомжтой болгосон. Ингэхдээ хэрэглэгч зөвхөн дөрвөн оронтой нууц кодоор биш утасны тохируулга, царай болон биометрийн тусламжтайгаар нэвтэрч байгаа. Удахгүй E-Mongolia 4.0 шинэчилсэн хувилбарыг ашиглалтад оруулахаар ажиллаж байна.

СИСТЕМ БОЛОВСРОНГУЙ БОЛСНООР ҮЙЛЧИЛГЭЭГ ИЛҮҮ НАРИЙВЧЛАЛТАЙ АВАХ БОЛОМЖТОЙ

И-Монгол академи Монгол Улсын Засгийн газрын 2021 оны 283 тогтоолын дагуу үүсгэн байгуулагдаж 2022 оны нэгдүгээр сараас үйл ажиллагаа явуулж буй Улсын төсөвт үйлдвэрийн газар. Төрийн цахим шилжилтийг дэмжиж, төрийн үйлчилгээ, үйл ажиллагааг цахимжуулах талаар судалгаа хийх, мэдээллийн технологийн бүтээгдэхүүн, үйлчилгээг хөгжүүлэх, хэвийн үйл ажиллагааг хангах, мэдээллийн технологийн чиглэлээр сургалт зохион байгуулах, зөвлөх үйлчилгээ үзүүлэх зорилготой.

Өнгөрсөн жил тус системд хэд хэдэн онцлох хэсгүүд нэмэгдсэн. Тухайлбал, E-Business, E-Kids, E-Student зэргийг нэрлэж болно.

E-Mongolia системд сард дунджаар 520 сая гаруй хандалт ирдэг бөгөөд Монголоос 500 сая, Оросоос 2.1 сая, Өмнөд Солонгосоос 8.8 сая, Америкаас 1.7 сая, Сингапураас 1 сая, Австралиас 870 мянга хандалт тус тус ирдэг байна.

E-Mongolia платформ нь хэрэглэгчийн хандалт, сүлжээний урсгал, ачаалал зэргээ хянаж ачаалал ихтэй үед ухаалгаар өөрийгөө өргөтгөж, ачаалал буурсан үед буцаж багасгах чадвартай AI /хиймэл оюун ухаан/ дээр суурилсан функц бүхий динамик шийдэл нэвтрүүлснээр платформ үр ашигтайгаар ажиллаж, олон төрлийн хэмнэлт хийхээс гадна илүү хурдтай, гацахгүйгээр нэг агшинд хоёр сая хэрэглэгчийн ачааллыг зэрэг даадаг болж байна. Үүнээс үүдэн E-Mongolia платформтой хамтран ажиллагч төрийн бусад олон байгууллагууд өөрсдийн үйлчилгээний системийн аюулгүй байдал, ачаалал даах чадвараа сайжруулахад анхаарах зайлшгүй шаардлагатай болжээ.

2022 оны байдлаар Монгол Улсад хөгжлийн бэрхшээлтэй 115,115 иргэн байгаагийн  11.2 хувь буюу 12,892 нь харааны бэрхшээлтэй иргэд байна. Олон улсын WCAG стандартын дагуу хөгжүүлэлт хийснээр дурын дэлгэц уншигч программ ашиглан E-Mongolia системийг саадгүй ашиглах боломжтой болсон аж.

Мөн хэрэглэгч цахимаар үйлчилгээ авахад хялбар байхаар системийн өнгөний контраст өөрчлөх, шөнийн горимд шилжих, үсгийн фонт өөрчлөх, хэмжээг ихэсгэж багасгах тохиргоо хийжээ.

Иргэн бүрд үйлчилгээг хүргэх зорилгоор фэйсбүүк хаягаа E-Mongolia системтэй холбон төрийн үйлчилгээний мэдээллээ 2.5 сая хэрэглэгч мессенжерээр авсан байна. Тухайлбал, иргэний үнэмлэх, жолооны үнэмлэхийн хугацаа дуусахаас 30, гадаад паспортын хугацаа дуусахаас 180 хоногийн өмнө иргэнд сонордуулгаар очдог болж байна. Хамгийн чухал нь иргэн төрд байгаа мэдээллээ хянах боломж бүрдсэн. E-Mongolia системийн хэрэглэгчид төрийн 11 байгууллага дахь иргэний бүртгэл,  хаягийн өөрчлөлт, өрхийн гишүүд, гэрлэлт, гадаад паспорт, боловсрол, тээврийн хэрэгсэл, үл хөдлөх, газар эзэмших, ашиглах эрх болон эрүүл мэндийн даатгал төлөлт зэрэг 14 төрлийн мэдээллээ, хөгжлийн бэрхшээлтэй иргэний үнэмлэх, мэргэшсэн жолоочийн үнэмлэх, гадаад паспорт, 145267 оюутны үнэмлэх, 47400 багшийн үнэмлэх, мэргэшсэн жолооны үнэмлэх профайл хэсэгт харагдах ба эрхийн зөрчилтэй жолооны үнэмлэх болон хугацаа дууссан бичиг баримтууд анхааруулах тэмдэгтэй гарч ирдэг болжээ.

Төр хувийн хэвшлийн хамтын ажиллагааны хүрээнд: 

Өнгөрсөн 2023 онд И-Монгол академи Засгийн Газрын 100 дугаар тогтоолын хэрэгжилтийн хангах ажлын хүрээнд 785 үйлчилгээний судалгааг хийж, шинээр цахимжуулах 375 үйлчилгээний бодлогын даалгаврыг боловсруулснаас 20 байгууллагын 119 үйлчилгээг цахимжуулж, нэвтрүүлжээ. Мөн Emongolia app болон портал дээр нийт 227 үйлчилгээг шинээр нэвтрүүлсэн байна. Үүнээс гадна ХЗДХЯ, БШУЯ, ХНХЯ, ЗТХЯ-аас үзүүлдэг  цахим гэрчилгээ, үнэмлэх, картыг цахимжуулжнэвтрүүлснээр иргэд цаасан гэрчилгээгээ заавал биедээ авч явах шаардлагагүй болсон.

• Иргэний үнэмлэх-519,690

• Гадаад паспорт-988,945  

• Жолооны үнэмлэх-368,950

• Мэргэшсэн жолооны үнэмлэх – 44.812

• Хөгжлийн бэрхшээлийн карт-14,297

• Авто тээврийн хэрэгслийн цахим гэрчилгээ- 140,539

• Багшийн үнэмлэх 

• Оюутны үнэмлэх зэрэг. 

Эдгээрээс гадна онцолбол, Засгийн газрын 233 дугаар тогтоолын дагуу  тусгай зөвшөөрлийг цахимжуулах ажлын хүрээнд ГТСМТТ-тэй хамтран нийт 12 байгууллагын 93 тусгай зөвшөөрлийг цахимжуулж e-business.mn болон тусгай зөвшөөрлийн нэгдсэн сан license.mn Мөн “Зөвшөөрлийн нэгдсэн сан” үүсгэх ажлыг гааль татвар санхүүгийн мэдээлэл технологийн төвтэй хамтран хэрэгжүүлж нийт 17 мянга гаруйзөвшөөрлийн мэдээллийг зөвшөөрлийн нэгдсэн санд нээлттэй болгосон байна. Цахим хөгжил, харилцаа холбооны сайдын 2023 оны 08 дугаар сарын 05-ны өдрийн А/53 тоот тушаалаар батлагдсан “Цахим аймаг” бодлогын зөвлөмжийн хэрэгжилтийг хангах ажлын хүрээнд орон нутгийн төрийн байгууллагуудаас хүн, хуулийн этгээдэд үзүүлдэг төрийн үйлчилгээг дахин загварчлах, шинээр нэвтрүүлэх үйлчилгээний процессын шинжилгээг хийх зорилгоор тус газрын албан хаагчид 2023 оны арваннэгдүгээр сарын 19-нээс арванхоёрдугаар сарын  02-ны өдрүүдэд Баянхонгор, Өвөрхангай, Дархан-Уул, Сэлэнгэ, Дорнод, Сүхбаатар, Хэнтий, Дорноговь, Дундговь, Өмнөговь зэрэг 10 аймагт ажиллажээ. Ингэснээр орон нутгийн 24 байгууллагын үзүүлдэг 128 үйлчилгээг нэвтрүүлсэн байна. Өнгөрсөн гурван жилийн хугацаанд иргэд цахимаар төрийн үйлчилгээг авснаар нийт 746 тэрбум төгрөгийг хэмнэсэн тооцоолол гарчээ.