Орос, Украин руу түрэмгийлэл явуулснаас хойших хамгийн том хэмжээний хоригдол солилцоог хийлээ. Хоригдол солилцоо сүүлийн саруудад зогсонги байдалд ороод байсан ч энэ удаад 230 украин олзлогдогч эх орондоо ирэв. Өмнөх удаагийн солилцоо наймдугаар сард болсон.

Нэгдүгээр сарын 3-нд суллагдсан 230 хоригдлын ихэнх нь жирийн цэргүүд бөгөөд цагдаагийн нэг ажилтан, зургаан энгийн иргэн багтжээ. Олон улсын Улаан загалмайн хорооноос баталгаажуулсан албан ёсны олзны статустай хүмүүс болон сураггүй алга болсонд тооцогдсон украинчууд мөн багтсан. Түүнчлэн цэргийн хөгжимчин, жирэмсний амралттай байсан цэргийн алба хаагч, Чернобьльд үүрэг гүйцэтгэж байгаад олзлогдсон харуулууд буцаж иржээ. Албаныхны мэдээлснээр олзныхон дунд таван эмэгтэй хүн байна. Тэдний нэг нь Украины тэнгисийн явган цэргийн 36 дугаар бригадын эмч юм. 

Энэ солилцоог зохион байгуулахад Арабын нэгдсэн Эмират улс идэвхтэй үүрэг гүйцэтгэжээ.

ОХУ-д дор хаяж 3500 олзны хоригдол байгаа гэж Украины эрх баригчид арванхоёрдугаар сард мэдээлж байсан. Гэвч бодит байдал дээр үүнээс олон хүн байгаа гэж үзэж байна.

Ерөнхийлөгч Зеленский хэлэхдээ "Бид хэдий чинээ олон орос олзолно, солилцооны хэлэлцээ төдий чинээ үр дүнтэй байна" гэлээ.

Оросууд олзны украинчуудтай зүй бус харьцаж, олон улсын хүмүүнлэгийн хуулийг зөрчсөн гэж удаа дараа буруутгагдсан. Тэр бүү хэл эзлэгдсэн бүс нутгуудын украинчуудыг өөрсдийнх нь эсрэг тулалдуулахаар шахамдуулсан гэх мэдээлэл ч бий. Украины олзныхныг эрүүдэн шүүж, цаазалж буй бичлэг ч цахим сүлжээнд нийтлэгдсэн. Албаныхны мэдээлснээр, Оросын арми Запорожье мужийн Роботинегийн ойролцоох байлдааны үеэр Украины олзлогдогчдыг амьд бамбай болгон ашигласан байна. 

Эх сурвалж: THE KIYV INDEPENDENT