Израилийн тагнуулын албаны нэрийн өмнөөс ажилласан байж болзошгүй 34 хүнийг Турк баривчилжээ. Туркт ажиллаж, амьдарч байгаа Палестин, Хамастай холбоотой хүмүүсийг Израиль онилох гэж оролдвол ноцтой үр дагаварт хүрнэ гэж Режеп Тайип Эрдоган саяхан анхааруулсан. Турк улс нь Хамасыг террорист байгууллага гэж үздэггүй бөгөөд сүүлийн 10 жилийн хугацаанд олон удаа Исламын бүлэглэлийн улс төрийн удирдагчдыг хүлээж авсан байна. 

Баривчлагдсан 34 хүний ​​дийлэнх нь гадаадын иргэд байжээ. Истанбулын прокурорын газраас нэмж 12 сэжигтнийг эрэн сурвалжилж байгаа аж. 

Газын зурвас дахь мөргөлдөөн эхэлснээс хойш Турк, Израилийн харилцаа тасарсан. Тус улс Израилийн удирдагчдыг Гааг дахь Олон улсын эрүүгийн шүүхээр шүүн хэлэлцэхийг шаардаж буй. Түүнчлэн ерөнхийлөгч Эрдоган Израилийн ерөнхий сайд Беньямин Нетаньяхуг хамгийн хатуу үгээр шүүмжлэх болсон. Өнгөрсөн долоо хоногт л гэхэд тэрбээр Нетаньяхуг Адольф Гитлертэй зүйрлэж, барууны орнуудыг терроризмд дэмжлэг үзүүлэхээ зогсоохыг шаарджээ. Мөн Тель-Авив дахь Анкарагийн Элчин сайдыг эргүүлэн татсан байна. 

Истанбулын гудамжинд Даваа гаригт Израилийн засгийн газрыг эсэргүүцсэн томоохон жагсаал хүртэл болсон.

Эрдоган, Нетаньяху нар есдүгээр сард Нью-Йоркт болсон НҮБ-ын уулзалтын үеэр уулзахдаа энэ онд албан ёсны дээд хэмжээний уулзалт хийх талаар ярилцсан байсан. Гэвч аравдугаар сард нь Хамас бүлэг Газын зурваст халдлага үйлдсэн билээ. 

Эх сурвалж: AFP