Ялсан намын “саалийн үнээ” болж ирсэн уулын баяжуулах “Эрдэнэт” үйлдвэрт өнөө жилээс их цэвэрлэгээ хийх нь ээ. Энэ тухай тус үйлдвэрийн захирал Г.Ёндон мэдэгдээд байна.

Тэрбээр “ Эрдэнэт үйлдвэрийн уул геологийн нөхцөл байдал тогтмол хүндэрч байгаа энэ нөхцөлд чадварлаг, цомхон бүтцээр ажиллах шаардлага тулгарч байна. Иймд зөвхөн сонгон шалгаруулалтаар хүмүүсээ ажилд авна. Хоёрт, ажлын байранд шинэчлэл хийж, үр ашигтай ажиллуулах шаардлага үүсч байгаа. Үүний тулд ажлын байранд тохирохгүй мэргэжлээр ажиллаж байгаа асуудлыг тодорхой болгоно.

Боловсрол, шинжлэх ухааны яаман дээр дээд боловсролын дипломын бүртгэлийн асуудлыг шалгаж нягталж байна. Энэ онд үйлдвэрийн хэмжээнд бүх ажлын байранд чиг үүргийн шинжилгээг хийнэ. Өмнө нь хийлгэхэд нийт ажилчдын гуравны нэгийг нь цомхотгох хэрэгтэй гэсэн дүн гарч байсан. Тиймээс бид дахин энэ шинжилгээг хийж, илүү цомхон мэргэжлийн хүмүүсийг сонгож авдаг чиглэл рүү орно. Уурхайчин хүмүүс хүүхдүүдээ сайн боловсролтой болгохын төлөө явах ёстой болохоос биш ажлын байр өвлүүлдэг тогтолцоо байх ёсгүй” гэж мэдэгдээд буй юм.

"Эрдэнэт" үйлдвэр нь нийт 5800 гаруй ажилтан, албан хаагчтай. Тэдний гуравны нэгийг цомхотгоно гэж үзвэл дор хаяж 1000 гаруй хүнийг чөлөөлөх шаардлагатай болж байгаа билээ. Гэхдээ энэ онд УИХ-ын сонгуультай. Засгийн газар солигдох бүрийд "Эрдэнэт" үйлдвэрийн удирдлагыг сольдог зуршилтай. Тиймээс шинээр бүрэлдэх Засгийн газрын тэргүүн хэн байх вэ гэдгээс мөн олон зүйл шалтгаална. УИХ-д 126 гишүүн сонгогдоно. Тэдгээр нь "Эрдэнэт" үйлдвэрт хамаатан садан, найз нөхөд, авгай хүүхдээ ажилд оруулна гээд "чичирцгээчихгүй" бол давхардал үүсгэж буй ажлын байрыг цомхотгох нь зүй ёсны хэрэг юм. Харамсалтай нь, төрийн өмчит компаниудад цомхотгол хийх сонирхол МАН-д байдаггүй. Яаж төрийн өмчит компани руу "шахаа" хийж, хэдэн төгрөг унагаж авах вэ, яаж хүнээ "шахаж" цалин өндөртэй ажилтай болгох вэ гэдэг нь нэгдүгээр асуудал байсаар ирсэн юм.

Г.ХОРОЛ