Херсон мужийн өмнөд хэсэгт байрлах Каховка усан цахилгаан станцын даланд өнгөрсөн зургадугаар сард гэмтэл гарч, үерийн аюул нүүрлэсэн. Далангийн эвдрэл олон мянган хүний амь амьдралтай холбогдож, дэлхий дахинд улаан буудай, эрдэнэ шишийн үнэ ч өссөн билээ.

Оросын эрх баригчид тухайн үед 59 хүн нас барсан гэж мэдээлсэн. Гэвч бодит байдал дээр үүнээс хавьгүй олон хүн нас барсан гэж үзэж байна. “Associated press” агентлагаас эрэн сурвалжилснаар үерт өртөж нас барагсдын тоо 200-300 аж. Мөн одоог хүртэл сураггүй байгаа хүмүүс ч бий.

Нэрээ нууцалсан сайн дурын ажилтан үерийн үеэр дор хаяж 100 цогцос олсон байна. Цогцсуудыг Олешки дахь төв оршуулгын газарт аваачиж оршуулжээ. Гэвч сүүлд нь Оросын эрх баригчид сайн дурын ажилтныг сүрдүүлж, дахин цогцос цуглуулахыг нь хориглосон байна.

Үерийн эхний гурван өдөр сайн дурын ажилтнууд л ажилласан бөгөөд эрх баригчид огт үзэгдэж харагдаагүй аж. Эрх баригчид гурав хоногийн дараа ирэхдээ живсэн хохирогчдод нас барсны гэрчилгээ олгохыг хатуу хориглосон тушаалтай иржээ. Гэхдээ эмч нар Киевийн бүртгэлийг алдагдуулахгүйн тулд орос, украин хэлээр нууцаар гэрчилгээнүүдийг гаргасан байна. Эмч нарын гэрчилгээ гаргах эрх хязгаарлагдсанаар нас барагсдын тоог үнэн бодитоор баримтжуулах боломжгүй болсон юм.

Эх сурвалж: ASSOCIATED PRESS