Ираны Исламын хувьсгалт гвардын топ генерал Рази Мусави Даваа гаригт Сирид амиа алдсан. Түүнийг Израилийн тал хөнөөсөн гэж үзэж байна. Тодруулбал, Рази Мусави Дамаскийн захын дүүрэг Сайида Зейнабт Израилийн агаарын цохилтод өртөж нас баржээ. 

Рази Мусавигийн үхлийн төлөөсийг Израиль төлөх болно гэдгийг Ираны ерөнхийлөгч Эбрахим Раиси анхаарууллаа.

"Израиль энэ гэмт хэргийнхээ төлөөсийг төлөх л болно. Энэ бол бүс нутаг дахь сионист дэглэмийг булаан авч буй арчаагүй хэлбэр гэдэг нь эргэлзээгүй" гэж Раиси хэллээ. Ираны Гадаад хэргийн сайд Хуссейн-Абдоллаиан ч бас Мусавигийн талаар жиргэжээ. "Израиль хүндхэн зүйлтэй тулгарлаа. Мусави бол Иран болон бүс нутгийн аюулгүй байдлыг сахин хамгаалахын төлөө олон жил зоригтой тэмцсэн генерал" гэж тэр жиргэсэн байна.

Харин Израилийн Батлан хамгаалах хүчний хэвлэлийн төлөөлөгч Даниел Хагари агаарын довтолгооны талаар тайлбар өгөхөөс татгалзав.

Израиль болон Хезболла бүлэглэл хоорондын харилцаа хурцадмал байгаа үед энэхүү агаарын цохилт боллоо. Газын зурвасын мөргөлдөөн эхэлснээс хойш Иран, Израилийн харилцаа улам хурцадсан.

Мусави нь 2020 онд АНУ-ын агаарын цохилтоор амиа алдсан Ираны генерал Кассем Сулейманигийн ойрын холбоотон байв. Тэрээр Иран, Сирийн хоорондын цэргийн холбоо харилцааг зохицуулдаг гол хүн байжээ. Түүнчлэн Хезболла бүлэглэл рүү зэвсэг нийлүүлэхэд оролцсон хүн юм.

Эх сурвалж: THE HILL