Энэтхэгийн далайгаар химийн бодис тээвэрлэж явсан хөлөг онгоц Иранаас хөөргөсөн нисгэгчгүй нисэх онгоцны цохилтод өртсөнийг АНУ мэдэгдлээ. Тодруулбал, "Chem Pluto" хөлөг орон нутгийн цагаар Бямба гаригийн 10:00 цагт Энэтхэгийн эргээс 370 км зайд цохилтод өртсөн байна. Далайн аюулгүй байдлын "Амбрей" компанийн мэдэгдсэнээр уг хөлөг Израильтай холбоотой бөгөөд Саудын Арабаас Энэтхэг рүү явж байжээ. 

Цохилтын улмаас гарсан галыг унтраасан бөгөөд амиа алдсан хүн байхгүй. Гэхдээ хөлгийн цистернийн бүтцэд гэмтэл учирч, хөлөг усанд автсан. Энэтхэгийн тэнгисийн цэргийнхэн тусламж үзүүлэхээр нисэх онгоц, байлдааны хөлөг онгоцоо илгээжээ.

"Chem Pluto" нь Либерийн далбаатай, Японы эзэмшилд байдаг, Нидерландад үйл ажиллагаагаа эрхэлдэг химийн бодис тээвэрлэгч хөлөг онгоц аж. 

Йемен дэх Ираны дэмжлэгтэй Хусит босогчид Улаан тэнгис дэх хөлөг онгоцууд руу сүүлийн үед хэд хэдэн удаа халдсан. Тухайлбал, өчигдөр Хусит бүлэглэлийн хяналтад байдаг бүс нутгаас Улаан тэнгис дэх олон улсын тээврийн зам руу хоёр ч баллистик пуужин харважээ. Мөн бүс нутагт эргүүл хийж байсан АНУ-ын хөлөг онгоц дөрвөн ч нисгэгчгүй онгоцыг устгасан гэв. 

Хусит босогчид Газын зурваст үргэлжилж буй дайны улмаас Израильтай холбоотой хөлөг онгоцуудыг онилсон гэж үзэж байна. Халдлагад өртөх эрсдэл ихэссэн тул усан тээврийн томоохон компаниуд Улаан тэнгис дэх үйл ажиллагаагаа түр зогсоогоод буй. 

Эх сурвалж: BBC