Нүүрсний нөөцөөрөө Тавантолгойн Цанхийн дараа орохуйц Бортээгийн ордыг тендерээр халхавчлан авахыг санаархсан гэдэг асуудал нүүрсний сонсголын үеэр хөндөгдлөө. Учир нь, Тавантолгой ордын Бортээгийн ордод гэрээт олборлогчийг сонгох тендерийг 2021 онд зарлахад “МТАС” түншлэл шалгарсан юм байна. Уг түншлэлд “Монголиан контракт майнинг сейрвис” ХХК, “Таван хур” ХХК, “Админерал” ХХК, “Спэйшлмайнинг сервес” ХХК-ууд багтжээ. Мөн уг түншлэл нүүрсээ олборлохын зэрэгцээ зах зээлийн үнээр борлуулна. Ийм давуу монофоль эрхийг тендерээр халхавчлан авсан гэдэг асуудал яригдаж буй юм.

Ингэхдээ дээрх тендерийг зарлахын өмнө ТЭЗҮ-ийг өөрчилсөн. Мөн энэхүү тендерт “МТАС” түншлэл шалгарахаас өмнөх тендерийг зарлуут нэг хоногийн дараа цуцалсан зэрэг хардлага төрүүлсэн зүйлүүд ч болжээ.

Зарласан тендерийг яагаад нэг хоногийн дараа цуцалсан бэ. Хэн танд үүрэг өгч, тендерийг цуцалсан бэ гэдэг асуултад гэрчээр оролцсон Үнэлгээний хорооны нарийн бичгийн дарга О.Бат-Амгалан хариулт өгөв. Тэрбээр “Худалдан авах ажиллагааны газрын дарга н.Бат-Эрдэнэ үүрэг өгч, тендерийг цуцалсан. Тендерийн бүх бичиг баримтыг дотроос нь устга, тендерийг цуцал” гэсэн. Тухайн үед би “Тендерийг цуцлах албан бичиг ирсэн үү” гэж асуусан. Тэгтэл “Дээрээс буюу холбогдох эрх бүхий байгууллагаас тендерээ яаралтай буцаа гэсэн” гэв.

Харин ТЭЗҮ-ийг өөрчилсөн Эрдэнэс Тавантолгой” ХК-ийн Геологи төлөвлөлтийн хэлтсийн дарга Д.Уужимсанаа “Би өөрөө ганцаараа шийдэхгүй, бодохгүй шүү дээ. Энэ бол ТУЗ дээр яригдсан асуудал. Уул уурхай хүнд үйлдвэрийн яам, “Эрдэнэс Монгол” компани дээр яригдсан зүйл” гэсэн юм.

Бортээг нь 203.9 сая тонн коксжих нүүрс, 587.9 сая тонн хагас коксжих нүүрс, 1.5 тэрбум тонн эрчим хүчний нүүрстэй юм байна. Нийт нүүрсний нөөц 2.3 тэрбум тонн аж.

Г.ХОРОЛ