УИХ-ын Хянан шалгах түр хорооноос зохион байгуулж буй нүүрсний сонсголоор өчигдөр нүүрс тээвэрлэж, экспортод гаргасан 19 мянган машины мэдээллийг устгасан гэдэг ноцтой асуудал хөндөгдсөн. Эл асуудалтай холбоотойгоор Засгийн газрын холбогдох албан тушаалтнууд мэдээллийг устгах ажлыг хийгээд байгаа юм биш биз гэх хардлага дагуулах болсон. Тэгвэл Засгийн газрын хэрэг эрхлэх газрын дарга Д.Амарбаясгалан дараах хариулт өглөө. Тэрбээр “Өчигдөр 2016 оноос өмнөх цаг үеийн мэдээллийг устгасан байна гэдэг мэдээллийг олж сонссон. Эл асуудлыг сонсголыг зохион байгуулж буй УИХ-ын Хянан шалгах түр хорооноос тодруулсан нь дээр байх. Мэдээлэл хийсэн хүмиүүс нь илүү тайлбар хэлэх байх.

Бүртгэлгүй хилээр гарсан машин дотор миний нэр орчихсон явж байна лээ. Ямар ч гэнэ үү компанитай. Манайх үе удмаараа нүүрс, газар ухах бизнес хийдэггүй.  Тэр чиглэлээр бизнес хийх сүсэг бишрэлгүй айл. Намайг нүүрсний бизнестэй холбох гээд огт мэдэхгүй компанийн нэр тавьчихсан. Бас тэр сонсголдоо яагаад намайг дуудаж асуухгүй байгаа юм бол гэдгийг бас хэлчихье” гэв.

Г.ХОРОЛ