Улаанбаатар хотын авто зам нэлэнхүйдээ мөстсөнөөс тээврийн хэрэгслүүд мөлхөж байна. Энэ нь түгжрэлд ч нэрмээс болж, нийслэлчүүд 3-5 цагийг автозамд өнгөрүүлж байна гэж хэлж болно. Тухайлбал, Сонгинохайрхан дүүргийн 21 дүгээр хорооллоос-Геологийн төв лаборатори хүрэхэд автобус 1 цаг орчмыг зарцуулж буй юм.

Уг нь 21 дүгээр хорооллоос-Геологийн төв лаборатори хүрэхэд ердөө гурван буудал газар. Гэвч хүйтэн ид тачигнаж байгаа цагаар бага насны хүүхдээ тэвэрсэн, хөтөлсөн эцэг, эхчүүдийн хувьд автобусанд суухаас  өөр аргагүй байгаа бол ахмад настнуудын хувьд ч халтиргаатай замд алхах боломжгүй тул мөн л нийтийн тээврээр зорчихоос өөр сонголтгүй байна.

Дээр нь автобуснууд хуучин, шинээсээ үл хамаарч цэвдэг хүйтэн байгаа нь зорчигчдын хувьд нийтийн тээврийг сонгосны шийтгэл болж буусаар буй юм.

Уг нь өнгөрсөн хоёрдугаар сард нийслэлээс улаан автобусыг Хятад улсаас оруулж ирэхдээ “Шинэ автобусууд хөгжлийн бэрхшээлтэй иргэдэд зориулсан стандарттай. Бууж суух төхөөрөмжтэй. Цахим дэлгэцтэй. Өвөл цонх нь цантахгүй. Зун кондишнтэй" гэдэг PR цацаж, сайрхаж байсан ч өнөөдөр өнөөх автобуснуудын бүх цонх битүү цантай, зорчигчид нь дагжирч чичирсээр бууж байна.

Багтаамж муутай байгаа нь түгжрэлтэй өдрүүдэд улам ч нэрмээс болж байна гэж хэлж болно. Учир нь, түгжрэлтэй цагаар зорчигчид автобусаа хамгийн багадаа 30-40 минут хүлээх шаардлагатай болж буй. Зарим тохиолдолд 1 цаг ч хүлээж байна. Буудал бүр дээр 100, 100-гаараа багшралдан автобус хүлээж байгаа зорчигчдоос ердөө 10 хүрэхгүй нь ганц нэг ирсэн автобусандаа багтаж орох нь гачлантай. Автобусанд багтаж суухын тулд зорчигчид жолоочид уур омгоо гаргаж байгаа бол жолооч багтаамж муутай автобусанд тултал чихсэнийхээ горыг амсч, зарим тохиолдолд хүрд нь ажиллахгүй болж сандаргаж байгаа бол, хаалгаа нээж чадахгүйгээс бууж суун, балбаж, онгойлгохоос аргагүй байдалтай ч тулж буй юм.

Иймээс шинээр оруулж ирэх автобус нь багтаамж сайтай, өвлийн тэсгим хүйтэнд цантаж, зорчигчдоо дааруулахгүй байх зэрэг хүйтний улиралд ашиглахад илүү тохиромжтой байхаар сонголт хийхгүй бол татвар төлөгчдийн 300, 400 тэрбум төгрөг салхинд хийсч мэдэхээр байна.

Нөгөө талдаа тээврийн цагдаа нар түгжрэлтэй цагаар хөдөлгөөн зохицуулахдаа зарчим чиглэлийн урсгалыг явуулахгүй 30-40 минутаар барьж, чангалдагаа зогсоохгүй бол цэцэрлэг, сургуулийн хүүхдүүдийнхээ гар хөлийг ч хайруулж мэдэх нь. Хоёр нас ч хүрээгүй жаалуудаа эцэг, эхчүүд нь цэцэрлэгээс аваад гараад ирэхэд автобус нь ч ирэхгүй, жижиг унаа нь ч ирэхгүй зутарч байна.

Дахин сануулахад Улаанбаатар хотын захирагчийн ажлын алба, дүүргүүд Тохижилт үйлчилгээний албаныхныг ажилд нь гаргаж, мөстсөн замууддаа давс, бодисоо яаралтай цацуулж, цэвэрлэгээг хийлгүүлэхгүй бол хотын төв зам ч ялгаагүй мөсөн гулгуурын талбай болж хувираад байна.
Ийм замд автомашинууд нь мөргөлдөж, зохиомол түгжрэл бий болоход ч нөлөөлж буй юм. Нөгөөтэйгүүр, зорчигч автобусандаа суухад ч халтиргаатай замд ар гэдэргээ савж унаж мэдэхээр аюултгүй байна. Явган замаа ч мөн цэвэрлэхгүй бол явганаар бэртэж гэмтсэн хүмүүсийн тоо ч Гэмтэл согог судлалын үндэсний төвийн ачааллыг нэмж болзошгүйд хүрлээ.

Улаанбаатар хотын захирагч  Х.Нямбаатар аа, Хот тохижилтынхонтойгоо учраа олоод ажилд нь гаргаж, авто замаа цэвэрлэж, аюулгүй болгохгүй бол ард иргэд зутарч байна шүү.

Г.ХОРОЛ