Путины түрэмгийлэл эхэлсний дараа Украинд болж буй үйл явдлыг хараад цочирдсон орос залуус олон. Тэдний нэг бол Карабас. Карабас эх орныхоо эсрэг үйлдэл хийхээр шийдэж, Украинд хүрэх арга зам хайж эхэлжээ. Үүнийгээ хэрэгжүүлэхийн тулд тэр бараг нэг жил зарцуулсан байна.

Тэр өдгөө Сибирийн батальоны бүрэлдэхүүнд тулалддаг болсон. Тус батальон нь хэзээ нэгэн цагт Путиныг огцруулна гэж найдсан оросуудаас бүрддэг. Гишүүд нь ихэвчлэн Оросын зүүн хязгаарын үндэстний цөөнх аж. Эх орныхоо эсрэг тулалдаж буй тус батальон нь зургаан сарын хугацаатай юм.

“Би Оросын ард түмэнд сэтгэл дундуур байсан. Тиймээс би энд ирж, эрх чөлөөтэй Украины төлөө тэмцэхийг хүссэн. Түрэмгийлэл анх эхлэхэд миний таньдаг оросуудын ихэнх нь Путиныг сохроор дэмжиж байсан. Эсвэл дайнд хайхрамжгүй хандаж байсан. Үүнийг олж мэдээд ихэд сэтгэл зовсон” гэж Карабас ярьжээ.

"Оросын эрх чөлөөны легион", "Оросын сайн дурынхны корпус" зэрэг Украины бусад сайн дурын ангиас ялгаатай нь Сибирийн батальон албан ёсоор Украины байнгын армийн нэг хэсэгт тооцогддог. Тус батальоны дайчид аюулгүй байдлын урт хугацааны шалгалтад ордог. Түүний дараа тэднийг сургалтад хамруулсны эцэст фронт руу илгээдэг ажээ.

Сибирийн батальонд улам олон хүн нэгдэнэ гэж Украины удирдагчид найдаж байна. Одоогийн байдлаар ирсэн хүсэлтүүдийг нэгтгээд үзвэл тус батальон 300 орос цэргийн бүрэлдэхүүнтэй болох аж.

Эх сурвалж: EURO NEWS