Ажилдаа явахдаа олон цаг зарцуулах нь сэтгэл гутралд хүргэдэг

Өмнөд Солонгост хийсэн нэгэн судалгаагаар ажилдаа ирж, явахдаа нийтийн тээврээр эсвэл автомашинд түгжирч удаан хугацаа зарцуулах нь сэтгэцийн эрүүл мэндэд ямар хор хөнөөлтэй болохыг харуулжээ. Замын хөдөлгөөн, чимээ шуугиан, агаарын бохирдол зэрэгт удаан хугацаагаар зорчиход бухимдал төрдөг нь дэлхий нийтээр хүлээн зөвшөөрөгдсөн ч эрүүл мэндэд үзүүлэх сөрөг нөлөөллийг ойлгоход, ялангуяа Азийн орнуудад ихээхэн зөрүүтэй байсаар байна.

Эдийн засгийн хамтын ажиллагааны байгууллагын орнуудын дундаас Өмнөд Солонгост хүмүүс ажилдаа явахдаа хамгийн урт хугацаа зарцуулдаг дээр нь сэтгэл гутралын түвшин өндөр байдаг учраас энэ цогц судалгааг хийх үндэс суурь болжээ. Инха их сургуулийн эмнэлгийн доктор Ли Дун Вукээр ахлуулсан багийн хийсэн судалгааг Дэлхийн эрүүл мэндийн байгууллагын эрүүл амьдралын индексээс авсан 20-59 насны 23,415 хүний мэдээллийг судалсан байна.

"Тээвэр ба Эрүүл мэнд" сэтгүүлд хэвлэгдсэн уг судалгаагаар өдөрт 1 цагаас илүү хугацааг автозамд өнгөрүүлдэг хүмүүс үүнээс бага цагийг зарцуулдаг хүмүүсээс сэтгэл гутралд өртөх нь 16 хувиар нэмэгддэг байх магадлалтай байна. Өдөрт дунджаар 47 минутыг ажилдаа явахад зарцуулдаг гэж тооцвол энэ нь долоо хоногт 4 цагийг автозамд өнгөрүүлдэг гэсэн үг.

Түүнчлэн долоо хоногт 52-оос дээш цагаар ажилладаг, хүүхэдгүй, ганц бие хүмүүс ажилдаа явахдаа урт хугацаа зарцуулдаг бол сэтгэл гутралын шинж тэмдгүүд илүү тод илэрчээ.

Судалгаагаар зорчигчдын сэтгэцийн эрүүл мэндэд нөлөөлж буй хүчин зүйл нь нийгэм, эдийн засгийн нөхцөл байдал гэдгийг тодорхойлсон. Судлаачид нас, орлого, ажил мэргэжил гэх мэт янз бүрийн хүчин зүйлүүдэд тохируулсан боловч гэр бүлийн түүх гэх мэт хувь хүний эрсдэлт хүчин зүйлсийг тооцож чадахгүй байгааг судлаачид тэмдэглэжээ. Энэхүү судалгааг цар тахлын улмаас зайнаас ажиллах практикт шилжихээс өмнө хийгджээ.

Энэхүү судалгааны үр дүнгээс сэтгэл гутралын шинж тэмдгүүдэд ажилдаа явах цаг хугацааны сөрөг нөлөөллийг үр дүнтэй бууруулахын тулд нас, хүйс, орлого зэрэг хүн ам зүйн онцлог шинж чанаруудыг хамарсан интервенц хийхийг шаарджээ. Судалгаанд мөн ажилдаа явах цагийг багасгах, ялангуяа бага орлоготой ажилчдын дунд сэтгэцийн эрүүл мэндийг сайжруулахын тулд тээврийн дэд бүтцийг сайжруулахыг зөвлөж байна.

ЭХ СУРВАЛЖ: NEXT SHARK