Энэ онд  Ханжоугийн Азийн наадам тохиосон учир хүчтэй өрсөлдөгч олон байна. Олимпийн төрлийн хүчтэй өрсөлдөгч нараас гадна мэргэжлийн бокс, цахим спортын баг тамирчид өрсөлдөөнд нэмэгджээ. Дугуйн спортын С.Жамбалжамц, байт харвааны Б.Отгонболд нар энэ оны онцлох амжилтыг үзүүлж, Азийн наадмаас хүрэл, алтан медалийн эзэд болсон бол "PUBG"-ийн А.Бүрэнбаяр/TOP/ дэлхийн аваргад аман хүзүүдэж, томоохон тэмцээнүүдийн шилдгээр шалгарсан амжилттай. Мэдээж их спортын тамирчдаас Ё.Басхүү 2023 оныг онцгой үдэж буй.

Энд нэг зүйлийг онцлох хэрэгтэй. Тодруулбал, эрэгтэй шилдэг тамирчны шагналд саяхан болж өнгөрсөн "PUBG Mobile"-ийн дэлхийн аварга болсон "IHC Esports" болон Азийн наадмаас мөнгөн медаль хүртсэн "dota2"-ийн "IHC Esports" багийг нэр дэвшүүлжээ. Угтаа тэднийг баг гэдэг утгаар нь спорт тоглоомын оны шилдэг багт нэр дэвшүүлэх учиртай байсан биз. Ямартай ч хувь хүнд олгодог шилдэг эрэгтэй тамирчны шагналд дөрөв, таван хүнтэй бүхэл бүтэн багийг нэр дэвшүүлсэн нь хачирхалтай.

Энэ шагналын гол өрсөлдөөн бокс, чөлөөт бөхийн тамирчдын хооронд өрнөх төлөвтэй. Боксын дэлхийн аваргаас Монголын тамирчид бахдам амжилтыг үзүүлж, мөнгө, хүрэл медалиудыг хүртсэн. Мөн чөлөөт бөхийн тамирчид дэлхийн аваргаас хоосонгүй. Тэдний араас Монголын усанд сэлэлтийн түүхэнд мөс хагалсан Б.Энххүслэн, түүхэн амжилт үзүүлсэн снукер биллиардын Б.Нарантуяа нарын тамирчид хүчтэй өрсөлдөөнийг үзүүлнэ.

Азийн аваргад хоёр дахь удаагаа түрүүлсэн Монголын 3х3 сагсан бөмбөгийн үндэсний шигшээ баг энэ шагналын гол өрсөлдөгчид. Ази төдийгүй Австрали, Шинэ Зеаландын хүчирхэг багуудтай гал гарсан өрсөлдөөнийг үзүүлж, Азийн аварга гэх цол хэргэмээ эргүүлэн авсан. Мөн хөлбөмбөгийн ФС Улаанбаатар баг шинэ түүхийг бичиж, "AFC Cup" тэмцээнд тун амжилттай оролцож буй. Маргааш/2023.12.14/ болох хэсгийн сүүлийн тоглолтоос хамааран тэд хасагдах шатанд шалгарах эсэх нь шийднэ.

Дээрх үндсэн гурван гол номинациас гадна дараах номинациудад шилдгүүдийг тодруулна.