Хятадын дарга Ши Жиньпин өнөөдөр /2023.12.12/ Вьетнамд айлчилж байна. Вьетнам сүүлийн үед барууны холбоотнуудтай дипломат харилцаагаа нэг шат ахиулаад байгаа билээ.

2017 оноос хойш Ши Жиньпин анх удаа Вьетнамд айлчиллаа. Айлчлалын хүрээнд Ши Жиньпин Вьетнамын Коммунист намын ерөнхий нарийн бичгийн дарга Нгуен Фу Трон, ерөнхийлөгч Во Ван Туон, ерөнхий сайд Фам Мин Чин болон Гадаад хэргийн сайд нартай уулзана.

Ши Жиньпиний айлчлал нь Вьетнам улс барууны орнуудтай харилцаагаа ахиулж байгаад санаа зовсоны илрэл гэж зарим ажиглагч үзжээ. Тодруулбал, "Вьетнам улс нь Хятадын эсрэг эвсэлд нэгдэж магадгүй гэж Бээжин санаа зовж байгаа"-г Сингапур дахь "ISEAS-Ysof Ishak" хүрээлэнгийн ажилтан Нгуен Хак Гианг хэллээ. 

Энэ онд Хятад, Вьетнам улсууд "иж бүрэн стратегийн түнш" болсны 15 жилийн ой тохиож байна. "Иж бүрэн стратегийн түнш" гэдэг нь дипломат харилцааны хамгийн дээд хэлбэр юм. 

Вьетнам нь Зүүн өмнөд Азийн аюулгүй байдал, эдийн засагт стратегийн чухал үүрэг гүйцэтгэж байна. Үзэл суртлын хувьд Вьетнам нь Хятадтай илүү ойр байдаг. Вьетнамыг Хятадтай нягт холбоотой Коммунист нам удирддаг боловч сүүлийн үед тус улс барууныхантай илүү ойр дотно байгаа шинж илрэх болжээ. Тухайлбал, АНУ-ын ерөнхийлөгч Жо Байден өнгөрсөн есдүгээр сард Вьетнамд айлчилж, тус улсыг Хятадтай адил дипломат статустай болсныг онцлон тэмдэглэсэн юм. 

Энэ удаагийн айлчлалын хүрээнд Вьетнам улс Хятадтай дэд бүтцийн зарим гэрээ хэлэлцээрт гарын үсэг зурах төлөвтэй байна. Дэд бүтцийн гэрээ хэлэлцээрийг эдийн засгийн өсөлтийн түлхүүр гэж Вьетнам харж байна. Хятад улс хэдэн жилийн турш Вьетнамын хамгийн том худалдааны түнш байсаар ирсэн бөгөөд 2022 онд хоёр талын худалдааны эргэлт 175.6 тэрбум ам.долларт хүрчээ.

Эх сурвалж: AP