Дулаан автобусны буудал удахгүй нээлтээ хийнэ

Өвлийн хүйтэн өдрүүдэд иргэд гар, хөлөө хөлдөөх шахам удаан хугацаагаар автобус хүлээдэг нь бараг л өдөр тутмын хэвшил болсон билээ. Тэгвэл BRB компанийн захирал Ж.Энхжаргалан өөрийн хөрөнгөөр кабин хаус технологийг ашигласан автобусны дулаан зогсоолыг урд хөршид захиалан хийлгэсэн нь удахгүй нээлтээ хийх гэж байна.

Энэхүү зогсоолыг New Ulaanbaatar West Terminal буюу “Шинэ Драгон” төвийн бүтээн байгуулалтын төслийн орчин тойрноо сайжруулах ажлын хүрээнд хийлгэжээ.

Олон улсын стандартад нийцсэн тус зогсоолыг Сүлжмэлийн үйлдвэрийн урд зогсоол дээр байрлуулжээ. Одоогоор тог цахилгаан холбох зэрэг бэлтгэл ажлуудыг гүйцэтгэж байгаа бөгөөд ирэх долоо хоногт багтаан ашиглалтад оруулахыг зорьж байгаа юм байна.

“Драгон” төвийн ойролцоох автобусны буудлууд бол хамгийн хөл хөдөлгөөн ихтэй газруудын нэг юм. Тиймээс ч иргэд дулаан автобусны буудлыг ихэд сайшааж, өглөө оройд 30 минутаас хэдэн цаг хүртэл унаа хүлээх хугацаандаа дулаан газар зогсох боломжтой үүн шиг буудал бүх автобусны буудал дээр байдаг болоосой гэж байв. Автобус хүлээж буй нэгэн эмэгтэй “Заримдаа унаа хүлээж зогсоод тэсэхээ байхдаа ТҮЦ-т орж зогсох гэхээр худалдагчид уурладаг. Сүүлийн өдрүүдэд хүйтний эрч чангарч байгаа болохоор гадаа хүлээх их хэцүү байна. Насанд хүрсэн би ийм байхад хүүхдүүд, жирэмсэн ээжүүд, хөгшин настай хүмүүс ямар байх вэ. Ийм болохоор хүмүүс хувийн унаатай болохыг л бодно. Машин нэмэгдэхээр түгжрэл нэмэгдэх байх. Бүх автобусны буудлыг ингээд шийдчихвэл амар л байна” гэсэн юм.

Тус зогсоол нь 22мкв талбайтай бөгөөд их бие нь хөнгөн цагаан бүтэцтэй, нарны хэт ягаан туяанаас хамгаалсан хоёр давхар шилтэй аж.

Бүхээг дотор суух сандал, галын хор, 24 цагийн камер, эмийн сан, заалны аудио систем, үнэгүй интернэт, утас цэнэглэх залгуурууд, өвөл халуунаар, зун хүйтнээр үлээх халаалтын системтэй бөгөөд хөгжлийн бэрхшээлтэй иргэд орж гарах боломжтой байдлаар шийджээ. Хүмүүс тус зогсоолыг архины хамааралтай хүмүүсийн хоноглох газар болох вий гэж болгоомжилж буй ч дулаан бүхээг дотор хоёр ээлжээр хүн ажиллан, өглөөд нээж оройд хааж байх тул шөнө хүмүүс хоноглох, эвдэж сүйтгэх тал дээр айх аюулгүй гэнэ.