Монголын цахим спортын хөгжил, тамирчдын ур чадвар тив дэлхийд алдар суугаа дуурсган амжилт үзүүлж байна. "CS2”-ийн “The Mongolz” баг Азидаа түрүүлсэн бол “PUBG Mobile”-ийн “IHC Esports” баг дэлхийн аварга болжээ.

“CS2”-ийн дэлхийн шилдэг багууд өрсөлдөх “ESL Pro League S19” тэмцээний эрх олгох Азийн бүсийн “ESL Challenger League Season 46” тэмцээний шигшээ тоглолт өчигдөр/2023.12.10/ боллоо. Уг тэмцээний шигшээд Хятадын “TYLOO” болон Монголын “The Mongolz” тунасан. Тэмцээнийг тааруу эхлүүлж, эхний тоглолтдоо хожигдон доод бүс рүү унасан “The Mongolz” дөрвөн дараалсан ялалтыг байгуулан эргэн дээд шатны шигшээд хүрч чадсан юм. Улмаар шигшээд Хятадын хүчирхэг багийг таван ээлжийн тоглолтод 3-2 гэсэн харьцаатай хожиж, 15 мянган ам.доллар төдийгүй гол шагнал болох “ESL Pro League S19”-ийн эрхээ авлаа. Шийдвэрлэх "Inferno" дээр болсон тоглолтод "TYLOO" 11-2 гэсэн харьцаатай тэргүүлж байсан ч "The Mongolz" гайхалтай эргэн ирж, 13-11 гэсэн харьцаатай ялалт байгуулсан юм. Шийдвэрлэх мөчид "bLitz" буюу Б.Гарьдмагнайн гайхалтай буудалтууд багаа сэргээсэн. Ялангуяа шийдвэрлэх 24 дэх үе дээр тун зоримог тоглолтыг үзүүлж, эсрэг багаа буулган авсан.

750 мянган ам.долларын шагналын сантай “ESL Pro League S19” тэмцээн ирэх оны дөрөвдүгээр сард Мальта улсад болно.

АНУ-ын визний асуудлын улмаас Атланта хотод болох “ESL Challenger” тэмцээнд оролцох эсэх нь эргэлзээтэй байсан “The Mongolz”-д элчингийн ярилцлагад орох цаг олдсон гэнэ. Хэрэв тэдний виз цагтаа гарвал “The Mongolz” энэ Баасан гаригт “Complexity Gaming” багийн эсрэг хэсгийн эхний тоглолтоо хийнэ.

Тэгвэл “PUBG Mobile”-ийн 2023 оны дэлхийн аваргад монгол багууд амжилт арвин оролцлоо. Куала Лампур, Истанбул хотуудад сар үргэлжисэн тус тэмцээнд Монголоос дөрвөн баг оролцсон. Нийт гурван сая ам.долларын шагналын сантай дэлхийн аваргын гранд финалд нийт гурван баг шалгарснаас Монголын “IHC Esports” 142 оноотой түрүүлсэн бол нутаг нэгт “Stalwart Esports” баг 138 оноотой дэд байр, мөн монгол залуусын нэгдэл “4Merical Vibes” баг 127 оноотой дөрөвдүгээр байр байрт оржээ.

“IHC Esports” хэсгийн шатнаас мултрах дөхөж хасагдах бүсээс ердөө тавхан онооны илүүтэйгээр дараагийн шатанд шалгарсан. Улмаар амьд гарах хэсгээс долдугаар байраар сүүлийн боломж олгох хэсэг рүү дэвшиж, эцэст нь гранд финалд үлдсэн билээ. Уулын бэлээс эхэлсэн аялал эцэст нь оргил дээрээ өндөрлөлөө.

Энэ удаагийн дэлхийн аваргын шилдэг тамирчнаар “IHC Esports” багийн “Zyol” буюу Б.Золбоот тодорчээ.

“IHC Esports” баг нийт 453,500 ам.долларын шагнал хүртсэн бол “Stalwart Esports” 263 мянган ам.доллар, “4Merical Vibes” 144 мянган ам.доллар хүртжээ.

“IHC Esports” баг анх удаагаа дэлхийн аварга болж, эцэст нь зорилгодоо хүрлээ. Аварга аваад нулимс унагах нь ч аргагүй биз. Тэд 2021 оны дэлхийн аваргад гуравдугаар байр, 2022 оны дэлхийн аваргад тавдугаар байр тус тус эзэлсэн бол өнөө жил дутуугаа гүйцээв.