Газын зурваст хүмүүнлэгийн тусламж үзүүлэхийн тулд гал зогсоох тухай НҮБ-ын Аюулгүйн зөвлөлийн тогтоолд АНУ-аас хориг тавьсны дараа тулалдаан улам ширүүсчээ. АНУ нь өнгөрсөн Баасан гаригт НҮБ-ын танхимд  хориг тавих эрхээ ашиглан Аюулгүйн зөвлөлийн 15 гишүүний 13 нь дэмжсэн хүмүүнлэгийн гал зогсоохыг шаардсан тогтоолыг хүчингүй болгов. Уг санал хураалтад Их Британи түдгэлзсэн.

Үүний хариуд Израилийн Ерөнхий сайд Биньямин Нетаньяху АНУ-ын хоригийг сайшааж байгаагаа илэрхийлж, "тус улс нь Хамас бүлэглэлийг устгах шударга дайнаа үргэлжлүүлнэ" гэж мэдэгдэв. Улмаар Израиль улсын албаныхан Газын өмнөд хэсэгт орших Хан Юнис хотын төвөөс оршин суугчдыг нүүлгэн шилжүүлэхийг тушаав.

Өмнө нь байгуулсан гэрээ өнгөрсөн долоо хоногт зөрчигдсөнөөс хойш Израиль Газын зурвасын өмнөд хэсэг рүү Хан Юнис рүү шахан хуурай замын довтолгоогоо өргөжүүлэв. Хоёр тал нэгэн зэрэг хойд хэсэгт байлдааны ажиллагаа нэмэгдэж байгааг мэдээлжээ.

Израиль кампанит ажилдаа ахиц дэвшил гарч байна гэж мэдэгдэв. Үндэсний аюулгүй байдлын зөвлөх Цачи Ханегби Израилийн зэвсэгт хүчин одоогийн байдлаар ХАМАС-ын 7000 дайчдыг устгасан гэж мэдэгдсэн бөгөөд энэ тооцоог хэрхэн хийсэн талаар дурдаагүй. Цэргийн дарга дэслэгч генерал Херзи Халеви цэргүүдэд "бид илүү их шахалт үзүүлэх хэрэгтэй" гэж хэлсэн байна.

Палестины эрүүл мэндийн яамны мэдээлснээр өчигдрийн байдлаар Хамас бүлэглэлийн удирддаг бүс нутагт Газын зурваст амиа алдагсдын албан ёсны тоо 17,700 давж, олон мянган хүн сураггүй болжээ. Нас барсан хүмүүсийн 40 орчим хувь нь 18-аас доош насны хүүхдүүд байсан гэж тус яам өмнө нь мэдээлсэн.

Газын зурвасын 2.3 сая оршин суугчдын дийлэнх нь аль хэдийн гэр орноо орхиж, дүрвэсэн байна. Нутаг дэвсгэр даяар тулалдаан үргэлжилж байна.

ЭХ СУРВАЛЖ: REUTERS