Нүүрсний хэргийн талаарх нээлттэй сонсголыг зохион байгуулж буй, УИХ-аас байгуулсан Хянан шалгах түр хорооны нэг гишүүн нь С.Ганбаатар. Тэрбээр Мягмар гаригийн /2023.12.05/ нээлттэй сонсголын үеэр Хянан шалгах түр хорооны дарга, Хууль зүй, дотоод хэргийн сайд Б.Энхбаяр түүний эхнэрийн бусадтай хамтран байгуулсан хөрс хуулалтын компанийг нь олон нийтэд ил болгосон юм.  Тодруулбал, С.Ганбаатарын эхнэр Б.Тунгалаг бусадтай хамтран байгуулсан "Болор Аграмба" ХХК нь  4.5 сая метр.куб хөрс хуулалтын ажил гүйцэтгэсний хөлс гэж 22.8 тэрбум төгрөгийг авчээ.  Б.Энхбаярын дэлгэсэн энэхүү мэдээллийг С.Ганбаатар эхлээд няцааж байсан боловч баримт дэлгэгдсэний дараа хэлэх үггүй болж, үнэнд гүйцэгдсэн.

Эх оронч, шударгуу улстөрчийн дүрд байнга тоглодог тэрбээр наанаа ариун цагаан хүн болж жүжиглээд ард нь нүүрс "ухдаг" байжээ. Атал үнэнийг нь дэлгэсэнд хорссон уу, С.Ганбаатар өнөөдөр /2023.12.07/ Б.Энхбаяраас хариугаа авсан бололтой, түүний худалч болохыг нь зарлав.

Болсон явдлыг тоймлоход нүүрсний хэргийн нээлттэй сонсголд "Эрдэнэс Тавантолгой" ХК-ийн гүйцэтгэх захирал асан Б.Ганхуягийг оруулах тухай саналыг С.Ганбаатар гаргажээ. Хариуд нь Б.Энхбаяр "Шүүхэд хандсан. Шүүх оролцуулахгүй гэж хэлсэн, шийдсэн" гэсэн нь худлаа байсан гэнэ. Тэрбээр  "Чингэлтэй дүүргийн эрүүгийн хэргийн анхан шатны шүүхийн удирдлагуудтай уулзахад тэд Б.Энхбаяр сайдаас юу ч ирээгүй, оролцуулах үгүй нь шүүхийн асуудал биш төрийн дээд байгууллага болсон та нарын асуудал" гэсэн болохыг дуулгаад "Монголын төрд дөрвөн цагдаа байхгүй бол би хэдэн дүү нартайгаа хойно, урд нь хянаад аваад ирсэн ч болно шүү дээ" гэжээ.  Өчигдөрхөн л "Б.Ганхуягийг нээлттэй сонсголд оролцуулах юм бол би өөрөө сайдын суудлаа өгөхөд хүрнэ" гэж байсан Б.Энхбаярын худлаа үг хоёр алхахгүй баригдав.

Ямартай ч нүүрсний хэргийн нээлттэй сонсголд "Эрдэнэс Тавантолгой"-н гүйцэтгэх захирал асан Б.Ганхуяг оролцохгүй болох нь ойлгомжтой болсон. Үндсэндээ энэхүү нээлттэй сонсголыг ашиглаад нэг хэсэг нь нөгөө хэсгээ намнахыг хүсч байгаа шиг мөн олон хүний  нуугдсан баг ч тайлагдаж байна. Эх орончийн дүр бүтээж ирсэн С.Ганбаатарыг эх орноо тоногчдын нэг байсан гэж хэн санах билээ. Эсрэгээрэ мөн л шударгуу улстөрчийн дүр бүтээж яваа Б.Энхбаярыг ийм худалч гэж хэн бодох билээ. Хэрээ, хэрээнийхээ зүг нисдэг бил үү эсвэл харыг гайхдаг ч бил үү.

Б.БАТ