"Маргаашаас цаг агаар муудаж, хүчтэй салхины гамшигт үзэгдэл болно"

ЦУОШГ-ын технологич инженер Э.Дариймаа ойрын өдрүүдийн цаг агаарын мэдээллийг өглөө.

Тэрбээр "Энэ оны арваннэгдүгээр сарын 30-ны байдлаар гаргасан зудын эрсдэлийн зургаас үзвэл, нийт нутгийн 70 орчим хувьд зудын эрсдэлтэй байна. Үүний 26 хувь нь нэн их, 43 хувь нь их, 26 хувьд нь дунд зэрэг эрсдэлтэй байгаа бол дөнгөж тавхан хувьд бага эрсдэлтэй байна. Аймгийн дүнгээр авч үзвэл, Увс, Сүхбаатар, Хэнтий, Дорноговийн ихэнх, Баян-Өлгий, Ховд, Завхан, Говь-Алтай, Архангай, Өмнөговь, Дорнодын зарим нутгаар нэн их эрсдэлтэй байна.

Үүний зэрэгцээ арванхоёрдугаар сарын 6-ний мэдээгээр нутгийн 71 орчим хувь нь цаг уурын ажиглалтын талбайн хэмжилтээр 1-37 см зузаан, хунгарласан газраа 50 гаруй см цасан бүрхүүлтэй болсон байна. Үүнээс хамгийн их нь Увс, Завханы нутгаар 10-37 см байна зузаан цасан бүрхүүлтэй.

Мөн 11 аймгийн 30 суманд цагаан зудын нөхцөл бүрдсэн бол 12 аймгийн 48 сум цагаанаар зудархуу байдалтай байна. Өнгөрсөн арваннэгдүгээр сарын 16-19-нд ихэнх нутгаар дулаарч, цасан бүрхүүлийн өнгөн хэсэг хайлж мөсөн бүрхүүл үүссэн нь малын бэлчээрлэлтийг улам хүндрүүлэх нөхцөл болж байна. Монгол орны хэмжээнд арваннэгдүгээр сар гарсаар гурван удаа цаг агаар муудсан. Эхнийх нь арваннэгдүгээр сарын 3-наас 5-ны өдрүүдэд болж, Төв аймгийн нутгуудаар 18 метр/ секунд хүрч салхилж, долоон хүн амь эрсэдсэн. Арванхоёрдугаар сарын 3-наас 4-нд шилжих шөнө Ховд аймагт 5-15 градусаар дулаарч, дулааны салхи ажиглагдаж, 28-38 метр/ секунд хүрсэн. Цаг агаарын гамшигт үзэгдэл ажиглагдсан.

Өнөө шөнөөс Баян-Өлгий, Ховд аймагт хүчтэй салхи салхилж, халуун хуурай салхи ажиглагдаж, 28-38 метр/ секунд давах төлөвтэй байна. Гамшгийн хэмжээнд хүрч болзошгүй байна. Энэ процесс маргааш нь үргэлжилж, Завхан, Архангай, Булган, Хөвсгөл, Дархан, Сэлэнгэ, төвийн аймгуудын баруун хойд талын сумдуудаар цас орж, цасан шуурга шуурна.

Арванхоёрдугаар сарын 7-нд баруун аймгуудын ихэнх нутаг, төв болон зүүн аймгуудын нутгийн хойд хэсгээр, 8-нд баруун болон төвийн аймгуудын нутгийн зарим газраар, зүүн аймгуудын ихэнх нутгаар цас орж, цасан шуурга шуурч, нутгийн өмнөд хэсгээр хүчтэй салхиний аюултай үзэгдэл ажиглагдах нөхцөл бүрдсэн байна. Цасан шуурга зүүн гурван аймгаар шуурч, өнгөрнө. Нийт нутгаар өвөлжилтийн нөхцөл байдал хүндрэх нөхцөл байдал бүрдэнэ. Мөн өнөөдөр ихэнх нутгаар агаарын температур суларч, говийн аймгуудаар 3-8 градус хүрч дулаарна. Энэ нь мөсөн бүрхүүл үүсгэх эрсдэлтэй.

Энэ сарын 8-нд ихэнх нутгаар хүйтний эрч эрс чангарч, Дархадын хотгор, Хөвсгөл, Хэнтийн уулархаг нутаг, Завхан голын эх, Хүрэнбэлчир орчим, Идэр, Тэс, Эг, Үүр, Хараа, Ерөө, Туул, Хэрлэн, Халх голын хөндийгөөр шөнөдөө -32…-37 градус, өдөртөө -21…-26 градус, Хангайн уулархаг нутаг, Орхон, Сэлэнгэ, Тэрэлж, Онон, Улз голын хөндийгөөр шөнөдөө -26…-31 градус, өдөртөө -15…-20 градус, говийн бүс нутгийн өмнөд хэсгээр шөнөдөө -11…-16 градус, өдөртөө -5…-10 градус, бусад нутгаар шөнөдөө -20…-25 градус, өдөртөө -11…-16 градус хүйтэн байх нь өвөлжилтийн байдлыг улам хүндрүүлж, зудын эрсдэлийг улам нэмэгдүүлж байгаа тул эртнээс өвөлжилтийн бэлтгэлийг сайтар хангаж, салхи шуурганы үед урьдчилан сэргийлэх арга хэмжээ авахыг онцгойлон анхааруулья.

Арванхоёрдугаар сард баруун аймгуудын нутаг, нутгийн зүүн өмнөд хэсгээр Олон жилийн дундажаас ахиу хур тунадас орж, олон жилийн дундажаас дулаан байх бол нутгийн зүүн хэсгээр олон жилийн дундажаас хүйтэн, нэгдүгээр сард нутгийн хойд хэсгээр олон жилийн дундажаас хүйтэн байх төлөвтэй байгаа нь өвөлжилтийн нөхцөл байдлыг хүндрүүлэх нөхцөл болж байна" гэдгийг анхаарууллаа.