ОХУ-ын Ерөнхийлөгч Владимир Путин энэ долоо хоногт Арабын Нэгдсэн Эмират, Саудын Арабт айлчилна гэж Путины туслах Юрий Ушаков мэдээллээ. Путин эхлээд АНЭУ, дараа нь Саудын Араб руу явж, угсаа залгамжлах ханхүү Мохаммед бин Салмантай голчлон хэлэлцээ хийнэ гэж тэрбээр мэдээлсэн байна.

ОПЕК+ газрын тос олборлогчдын бүлэг өнгөрсөн Пүрэв гаригт олборлолтоо сайн дурын үндсэн дээр өдөрт 2.2 сая баррелиар бууруулахаар тохиролцсоны дараа энэхүү айлчлал болж байна. Энэхүү мэдэгдлийн дараа нефтийн үнэ өнгөрсөн долоо хоногт хоёр хувиар буурч, Даваа гаригт дахин буурчээ. Брент маркийн нефтийн үнэ өчигдөр  бараг 0.6 хувиар буурч 78.45 ам.доллар болсон байна.

Путин сүүлийн жилүүдэд гадаадад бараг айлчлаагүй бөгөөд ихэвчлэн хуучин ЗХУ-ын орнуудаар зорчсон. Тэрбээр  эдгээр улсаас  гадна хамгийн сүүлд өнгөрсөн аравдугаар сард Хятадад айлчилсан.

Олон улсын эрүүгийн шүүх өнгөрсөн гуравдугаар сард  түүнийг баривчлах шийдвэр гаргаснаар Путины гадаадад зорчих боломж хязгаарлагдсан. Саудын Араб, АНЭУ нь тус шүүхийн гишүүн биш тул Путин  баривчлагдахаас айхгүйгээр хоёр улсад очиж болно.

ЭХ СУРВАЛЖ: REUTERS