Ираны агаарын хүчний чадавхийг сайжруулах хүчин чармайлтын хүрээнд ОХУ сөнөөгч онгоц болон довтолгооны нисдэг тэргүүд илгээх болжээ. ОХУ, Ираны батлан хамгаалахын харилцаа гүнзгийрч байгаад АНУ санаа зовох болсонтой зэрэгцээд энэхүү мэдэгдэл гарав.

Цагаан ордны топ албан тушаалтан өнгөрсөн долоо хоногт мэдэгдэхдээ "Хоёр улс цэргийн харилцаагаа өргөжүүлж буй нь Украин болон Ойрхи Дорнодын бүс нутагт сайн биш" гэжээ.

Су-35 сөнөөгч онгоц, Ми-28 довтолгооны нисдэг тэрэг, Як-130 тийрэлтэт онгоцуудыг илгээх төлөвлөгөөг ОХУ эцэслэн баталсныг Ираны хэвлэлд Мягмар гаригт мэдээлэв. Иран 1990 оноос хойш анх удаа сөнөөгч онгоц худалдаж авч буй нь энэ аж. Иран энэ оны эхээр Су-35 худалдан авах гэрээг эцэслэсэн гэдгээ зарлаж байсан. Гэхдээ довтолгооны нисдэг тэрэг, байлдааны сургалтын нисэх онгоц зэрэг нэмэлт техник авахаар ярилцаж байгаа гэж байжээ. Иран батлан хамгаалахын хүчин чадлаа бэхжүүлэхийн тулд олон тэрбум ам.долларын цэргийн техник хэрэгсэл хайж байна.

Харин ОХУ-ын хувьд Иранаас их бууны сум, удирдлагатай агаарын тэсрэх бөмбөг, Шахед дрон хэдийнэ авсан. Эдгээрийг ОХУ-ын арми Украины нутаг дэвсгэрт идэвхтэйгээр ашиглаж байна. Эдгээрээр зогсохгүй баллистик пуужинг ч ОХУ-д нийлүүлсэн гэж АНУ үзэж байна.

Ираны дэмжлэгийн хариуд ОХУ урьд хожид байгаагүй батлан хамгаалахын хамтын ажиллагааг амлаж байгаа аж. Тэр дундаа пуужин, электроник, агаарын довтолгооноос хамгаалах чиглэлээр хамтран ажиллах санал тавьж байна. 

Украинд довтлохоос өмнө ОХУ нь АНУ-ын дараа орох дэлхийн хоёр дахь том зэвсгийн нийлүүлэгч байжээ. Тодруулбал, Кремль дэлхийн 45 гаруй оронд зэвсэг худалддаг байсан бөгөөд үүний тал хувь нь онгоц байсан. Тиймээс өдгөө Иранд сөнөөгч онгоц нийлүүлэх нь Оросын арми Украин дахь дайндаа Ираны давуу талыг ашиглаж байна гэх хардлагыг үгүйсгэх юм. Мөн зэвсгийн нийлүүлэгч гэдэг нэр хүндээ авч үлдэх давуу талтай.

Эх сурвалж: BUSINESS INSIDER