Москвагийн Горькийн цэцэрлэгт хүрээлэн дэх мөсөн гулгуурын талбайн үүдний эргэдэг хаалганд тогтсон цасан дээр "Дайнд үгүй гэж хэлье" гэж хуруугаараа бичсэн эр 10 хоног шоронд хоригдох болжээ. Дмитрий Фёодоров нэртэй эр арваннэгдүгээр сарын 23-нд уг хэргийг хийсэн байна.

Энэ үйлдэл нь Оросын зэвсэгт хүчнийг гутаах зорилготой иргэний гэмт хэрэг гэж үзжээ. Дмитрий Фёодоровыг дайныг эсэргүүцсэн үг бичээд зогсохгүй цагдаагийн хэлтэст очихоос татгалзсан гэж шүүх үзсэн байна. Тэрбээр 10 хоногийн хорих ялаас гадна мөнгөн торгууль төлөх болсон ч хэдэн рубль гэдэг нь тодорхойгүй.

ОХУ-аас Украинд түрэмгийлэл эхлүүлсний дараахан эсэргүүцэгчдийг таслан зогсоох шинэ хуулиудыг баталсан. Шинэ хууль батлагдсанаас хойш 20 мянга орчим хүн баривчлагдаж, 800 эрүүгийн хэрэг үүсгэжээ. Путин ирэх онд зургаан жилийн бүрэн эрхийн хугацаагаа дахин сунгахаар хичээж буй үед тус улсад эв нэгдэл хамгийн их хэрэгтэй байгааг эрх баригчид онцолж байна. Гэтэл эрх баригчдыг эсэргүүцсэн дуу хоолойг хэрцгийгээр хааж боож байгааг шүүмжлэгчид буруутгасаар байна. Тухайлбал, супермаркет дахь үнийн шошгуудыг дайны эсрэг агуулгатай бичгээр сольдог байсан Санкт-Петербург хотын нэгэн иргэн энэ сарын эхээр хорих ял авчээ.

Эх сурвалж: REUTERS