УИХ дахь Ардчилсан намын бүлгээс ногоон автобусны худалдан авалтын ажиллагааг шалгах Хянан шалгах түр хороо байгуулах зорилгоор гишүүдээс гарын үсэг цуглуулсан байна.  Нийтдээ 20 гаруй гишүүн дэмжжээ. Энэ талаар УИХ-ын гишүүн Н.Ганибал дараах мэдээллийг өглөө.

Тэрбээр “УИХ дахь Ардчилсан намын бүлгийн 12 гишүүн дэмжиж гарын үсэг зурсан дээр  МАН-ын 11 гишүүн дэмжиж гарын үсэг зурсан байгаа.

УИХ-ын гишүүн П.Анужин, Д.Батлут, Х.Булгантуяа, Х.Ганхуяг, Ц.Даваасүрэн, Т.Доржханд, Ц.Мөнхцэцэг, Г.Тэмүүлэн, Ч.Ундрам, Ж.Чинбүрэн, Б.Энх-Амгалан, Ж.Эрдэнэбат нарын 11 гишүүн зурсан байна.

Бидний санаачлагыг дэмжиж, гарын үсэг зурсан гишүүддээ баярлалаа. УИХ-аас байгуулагдсан Хянан шалгах Түр хороо гэдэг бол хэнийг ч мөрдөн мөшгөх,  хэнийг ч танхимд дуудаж, мэдээлэл авах бүрэн боломж нээж өгч байгаа. Эрх баригч намынх ч гэсэн сөрөг хүчинтэйгээ хамтарч үнэн мөнийг олохын төлөө зорьж байна. Гарын үсгийг УИХ -ын даргад өргөн барина.  Гарын үсэг зурснаар өргөн баригдаад Түр хороо байгуулагдах нь баталгаажина гэсэн үг.

МАН-ын бүлгийн зарим гишүүн гарын үсэг зурахаас татгалзсан байна лээ.  Эрх баригчдынхаа хулгайг ил болгохгүйн тулд татгалзаж байж магадгүй, эсвэл хулгайтай холбоотой ч байж магадгүй.

Үнэн мөнийг олъё гэж байгаа бол хулгай, авлигаас ангид ажиллахын төлөө амлалтаа л биелүүлэх ёстой” гэсэн юм.

Г.ХОРОЛ