Чингэлтэй дүүргийн прокурорын газраас бичсэн эсэргүүцлийн дагуу “Бэлтэс мөрөн” ХХК-д холбогдох хэргийг Хөвсгөл аймаг дахь Эрүү, Иргэний хэргийн давж заалдах шатны шүүх хурлаар өнөөдөр /2023.11.22/ хянан хэлэлцэж, анхан шатны шүүхээр дахин хэлэлцүүлэхээр шийдвэрлэжээ.
Тодруулбал, Хөвсгөл аймаг дахь Эрүүгийн хэргийн анхан шатны шүүхээс 2023 оны зургадугаар сарын 6-ны өдөр 2595 иргэнд 48.484.419.600 төгрөгийн хохирол учруулсан “Бэлтэс мөрөн” ХХК-д холбогдох хэргийг нэмэлт мөрдөн шалгах ажиллагаа явуулахаар прокурорт буцааж шийдвэрлэснийг тус дүүргийн прокурорын газраас үндэслэлгүй гэж үзэн давж заалдах шатны шүүхэд эсэргүүцэл бичсэн.
Тэгвэл Хөвсгөл аймаг дахь Эрүү, Иргэний хэргийн давж заалдах шатны шүүх прокурорын эсэргүүцлийг хүлээн авч, “шүүгчийн захирамж үндэслэл бүхий болж чадаагүй, нэмж шалгуулахаар заасан ажиллагааг шүүхийн шатанд гүйцэтгэх боломжтой” гэж дүгнэсэн байна.